我，廢物大叔，係一個好怕參加婚宴既人

因為每一次去到婚宴，除左要放低一大筆入場費幫人充撐場面之外，更攞我命三千既係要睇一連串完全無新意既環節

MC入場搞連佢自己都唔想笑既爛Gag，播兩個主角既成長片段配以老土音樂，之後播兩個主角相識相戀既片段繼續配以老土音樂，播「朝拍晚播」片段，又係老土開門利是、玩新郎同兄弟、肉麻深情對白接新娘，跪安敬茶收利是收金器。

當觀眾係柔和燈光睇到開始有少少睡意既時候，片段完結，MC好High咁叫全場以掌聲歡迎一對新人入場，Spotlight直射一對新人，繼續配以老土音樂。兩個主角笑住咁慢慢行，兄弟姊姊團用花瓣掟向新人，以發洩整個婚禮由籌備到執行既辛酸。呢一刻，新娘就好似應屆香港小姐冠軍咁，優雅微笑，向經過既親朋揮手。

然後一對新人上到臺又係例牌多謝呢個多謝果個，切下蛋糕，交下杯，咀佢咀佢就例牌啦，有D新人仲會一時感觸而喊。其實最想喊既係台下既觀眾。

因為真係太公式化，好悶，而多數野又唔好食，同一圍檯既，一係就唔識，一係識但唔係成日見，見到都多數無咩野好講。到底世界上除左參加婚宴之外，有無任何一個要收你幾百到過千蚊入場費而到頭來係罰鳩自己既活動呢？我一時之間真係諗唔到。

係，我真係好憎去人地婚宴，但今次我呢個我唔去唔得，因為呢家係我女神既婚宴.......