8月7日，今年嘅夏季甲子園就開波喇，咁喺早前練習日嘅第2日，九州大分縣代表大分高校嘅女經理人「首藤桃奈」，就換咗波衫落球場同球隊進行守備練習，不過過咗15分鐘就有大會職員請佢離場……因為甲子園有明文規定，為咗避免發生危險，只可以有男生喺球場入面，不過講緊係正式比賽，練習時只要著整齊嘅波衫，就冇講明女生唔落得場。球隊監督「松尾篤」事後就表示歉意，係因為覺得「首藤桃奈」一直都好落力，所以想搵機會俾佢企喺球場上感受一下，「首藤桃奈」仲話一落場就緊張到手都震埋，可惜最後都係被發現……有網民就話呢個規定好似唔係好啱呢個年代，不過更多網民留意呢位3年級嘅女同學，話睇佢個樣幾可愛，而且性格應該都幾好……仲有，原來佢初中畢業禮嗰陣仲講過：「我要做棒球隊嘅經理人，一齊打入甲子園。」其實我即時諗起淺倉南，係，其實我仲停留喺明青學園攞甲子園冠軍嗰個年代。
















資料來源

http://headlines.yahoo.co.jp/hl?a=20160802-00000085-nksports-base

http://hayabusa3.2ch.sc/test/read.cgi/news/1470127079

http://gameover.com.hk/?p=296574