【里約奧運】1,500自之王感冒鳥 如果輸咗咪有得……

據中國《騰訊體育》獨家報道，日前自稱1,500米自由泳之王嘅孫楊患咗感冒鳥，唔知對呢位「寸王」嚟講係好消息定壞消息呢！

孫楊喺巴西當地時間星期五就會出戰男子1,500米自由泳初賽，仲會同早前寸佢係「作弊的人」嘅澳洲泳手賀頓同組㖭，雖然孫楊係倫敦奧運呢個項目嘅金牌得主，但一日未比賽一日都唔知邊個贏嘅，而據《騰訊體育》所講，佢哋喺巴西時間星期三朝早收到嚟自一位義工嘅消息，話喺奧運村嘅醫療室撞到孫楊，仲見到對方睇病攞藥，《騰訊體育》仲話之後證實孫楊係患咗感冒呀。

報道就話，孫楊喺贏咗200米自由泳決賽之後，因為要接受藥檢同放鬆按摩，返到選手村已經係深夜，食咗少少嘢之後就大覺瞓，不過到凌晨時份先至瞓得著，點知一瞓醒就覺得喉嚨唔舒服，後尾仲開始流清水鼻涕，結果向教練同隊醫報告咗之後就即刻去奧運村嘅醫務室開攞藥。根據報道就話，孫楊1,500米自由泳比賽唔會受到影響，因為佢食完藥休息咗兩、三個鐘之後已經恢復訓練，之但係報道亦指出，原本星期三要分下晝同夜晚操兩課嘅孫楊，喺教練安排之下放棄咗下晝嘅訓練，雖然佢唞咗幾個鐘之後都係去咗泳池練水，由4點到達練到7點，但確實係平時早咗結束訓練返奧運村嘅。

雖然少少感冒可能冇乜嘢，但要食藥個人難免會比較攰，而且點都要休息吓啦，咁對孫楊出戰1,500米自由泳比賽好難話完全冇影響噃。不過如果日前接受訪問自稱1,500米自由之王嘅孫楊到時真係一個唔覺意輸畀賀頓，咁強國網民就唔使咁辛苦去幫佢搵藉口喇~~

http://hk.apple.nextmedia.com/realtime/sports/20160811/55486651