卿姐找數　36年前吊帶look重現

劉慧卿兌現承諾，今日着上36年前的珍藏吊帶裙出席活動，真係少啲自信都唔得。(葉華英攝)

【on.cc東網專訊】立法會議員劉慧卿三十多年前任職記者時，身穿吊帶背心進行採訪為人津津樂道。卿姐早前承諾會在離開議會前穿上同一條吊帶裙現身人前，但去到最後一日開會竟然走數，她今日終於兌現承諾，着吊帶裙同黨友出席活動，唔少街坊見到佢「搏到盡」都發出嘩嘩聲，有唔少人更駐足觀看，亦有人舉起大拇指讚好。

卿姐話，上次着同一條裙現身係1980年，要着番30幾年前件衫都唔係咁容易，她仲挑戰大家，話80年代件衫真係無邊個可以着得到，自稱好環保咁話。卿姐着起條裙顯得非常興奮，仲拉起條裙尾轉咗半圈添。

被問到着吊帶裙要唔要節食，她大叫「黐線」，反問「我好肥咩？」，又笑稱要同黨友今晚着吊帶裙去蘭桂坊，接觸吓唔同街坊。