蘇施黃稱呼港隊運動員為「茂利」被人狂插，其實要數蘇施黃賤嘴嘅歷史真係有排數，其實呢種人真係「狗口長不出象牙」，口中無句係好嘢，一有機會就會講衰嘢。不過唔係人人都好阿蘇咁擺明居馬，因為賤嘴仲好可以有好多唔同型態唔同風格，總而言之，總有一個喺公司！

明刀明槍型

呢種人永遠都係講衰嘢，心中充滿不忿，所以一有機會就會踩人，嫌三嫌四，任何社會上、公司上嘅大小事，就算原本係好事，都會畀佢搵到位挑剔，雞蛋裡挑骨頭
，繼而用極度火爆、人身攻擊之類嘅形容詞踩到一文不值。

句句有骨型

呢種人相當陰險，所謂「無聲狗咬死人」，平時唔多出聲，但每次一出聲就一句KO人，夭心夭肺一矢中的，大盆冷水潑落嚟，單單打打。然後講完一句之後就唔出聲，直情等你無仇可報！

自吹自擂型

代表人物當然要數阿叻，唔放任何人喺眼內，你講乜佢哋都會表現到一副「世事已看透」嘅表情，好似樣樣嘢佢哋都覺得「濕濕碎」；你話做成單大生意咩？佢話「有幾大呀？好細啫。」有人升職咩？佢話「挨咗咁多年仲升唔到呀？」

無的放矢型

呢類最無賴，基本唔需要任何理由，終極型態就係阿蘇咁，將自己嘅無知都變成武器去攻擊人，蠻不講理。因為用口講唔使負責任，所以大放厥詞，呢種人無得同佢嘈，因為佢地嘅無賴就好似某啲國家咁，啱聽就聽；唔啱聽就唔同你玩！

https://hk.style.yahoo.com/公司總有幾張賤嘴-人衰口臭無朋友-1496432329343030.html