仲無恥過民建聯成功爭取


不少政治人物會透過公布「成功爭取」，話畀市民知佢有乜政績。參選立法會新界東直選嘅陳雲(陳云根)亦喺宣傳單張話自己就俗稱「網絡23條」嘅《版權（修訂）條例草案》發起白宮聯署，同埋派代表去美國領事館請願，成功逼令政府撤回草案，不過佢呢個「成功爭取」，就即時喺網上引發爭議。

其中當時極力反對法案通過嘅其中一個組織「鍵盤戰線」，其法律顧問蔡麒就喺facebook貼出陳雲嘅單張，留言話：「有D人真係唔知『醜』字點寫，仲要印係(喺)宣傳單張，你逼令？FF(網絡用語，意指幻想)夠未？」

蔡麒話無一個政黨敢唔提鍵盤戰線喺事件中嘅努力，質疑陳雲竟然歸功自己，更爆粗叫陳「返青山啦！」有網民表示認同蔡麒，認為陳雲嘅做法過分，有人重提當時其實時任美國駐港澳總領事嘅夏千福都支持草案通過，反問陳雲話向美國爭取，於事件中究竟有何作用。