http://hk.apple.nextmedia.com/realtime/supplement/20160829/55559382

60年代影相、70年代改機，到1994年開設典雅相機，替人維修及改機，還親手製造相機，凌兆鴻師傅的一生注定與相機形影不離。來到他位於佐敦的相機店，百多呎的空間放滿相機，從Leica到大片幅相機都應有盡有，但統統只作陳列，不作售賣。隨便拿起一部，他都如數家珍，記者好奇拿起放在地上的攝影機，凌師傅立即說道，「陳果當年拍《香港製造》就係用這部機！」

香港製造的，還有凌師傅的相機，與他的那段往事。「其實當年學攝影，都係因為懶！我從小就習畫，但很久才畫一張，影相就快得多。」凌師傅今年68歲，大概20歲時才正式學攝影，師承鄧雪峰老師，不過卻未有走上攝影之路，反而經常轉行，試過做汽車噴油、塑膠模、首飾，更曾畫行貨油畫，輾轉做過十幾份工。「同時做咁多行的原因，就係想搵自己的興趣。」正是在不同的行業學習新的事物，他對機械、焊接都有一定認識，間接造就後來的改機之路。
當年他買了相機，唔夠錢買鏡頭，便找來第二支鏡頭，改落自己部相機。「改改吓，原來可以當職業，就做了起來。」不論手錶還是相機，凌師傅買回來就拆開研究，也算得上無師自通，後來變做邊學，到90年代才全職幫人改機。改而優則做，之後乾脆做相機，自己設計機身，又落手落腳做，再買來零件裝嵌成相機。現時店內尚有幾部他的相機作品，平時他也主要用這幾部機影相，「在香港做相機的，除咗我，相信都冇乜第二個。」凌師傅就是那種快言快語的人。
那天到訪，剛好遇上有人上來改鏡頭，想將一支日本鏡改落哈蘇相機，只見他三言兩語後放下鏡頭，留低電話就走人。「有些客人會放低鏡頭，同我講『你鍾意點發揮都好，我都鍾意』。」翌日記者來到凌師傅位於葵涌的廠房，只見他兩三小時就搞掂，完成後套落自己的相機試玩，一臉滿意。「就算係相同的鏡頭，我改出來的效果都唔同，這才是吸引之處。」
他比喻，每次整機，就好似聽一個不同的故事，給予他動力。凌師傅說現在來改機的人也不是太多，有時一星期可能得一兩個，「每日畀心機做靚些，就好滿足。」老土問他何時退休，他笑說做到手慢腳慢為止，「你要做一份好有興趣的工，是很難找到的，我就找到了。」
記者：劉東佩
攝影：陳健邦