投票日愈近，外面愈紛擾。講得稍稍唔中聽嘅嘢，就被人插到上天花板，變左「無雞味嘅雞」。好煩，真係好煩。不如都講返啲切身嘢算。

我想講下新東補選期間發生嘅一件小事。

話說我當日喺呢度問左讀者一個問題：「點解成個補選，同志議題竟然無人提，尤其係同性婚姻？」然後就發生左健吾喺佢嘅電台節目，打電話問候選人有關同性婚姻嘅爭議性事件。

一反泛民對這議題的曖昩不明，本民前嘅梁天琦回答果句「義無反顧咁支持」我真係好鬼死 buy，而且亦只係得佢一個喺政綱度，用白紙黑字明言支持同志伴侶權利嘅。

因為呢個結果，我先後喺 Facebook PM 左梁天琦、黃台仰，仲有青年新政梁頌恆（Baggio）。前兩者我係想親口多謝佢地，後者就係純意見交流，爭取「泛民－大愛同運系統」以外嘅盟友。

當中梁天琦回答係「每人心入面都有一座斷背山，我不會妥協的」；黃台仰嘅回答係：「我地呢代無咩人真係會對（同志）平權反感，所以我地認為係一d好General 既野」；至於當時已 All In 支持本民前參選嘅梁頌恒，我將自己圖中果篇分析文章傳畀佢，希望佢可以同戰友 Share 下推動討論，或者能夠影響多啲政黨，喺九月換屆選舉納入相關政策。因為我一直相信，婚姻同歧視法議題無分先後，達者為先；只不過同運揸莊嘅人唔肯接受我呢個諗法。

結果，梁頌恆不但喺 Facebook 分享，仲真心求教，公開詢問「同性婚姻」與「反歧視法」是否有先後，其邏輯怎樣建構？

當今好多聲稱支持或反對同志的老中青候選人，根本連同志法例的基本知識都欠奉；梁頌恒能不恥下問去了解清楚相關政策，令我真心覺得呢啲青年從政者，對於政策議題研究其實是有心的。去到今次選舉，青年新政就全面針對性小眾平權的政策，睇黎我當日灌溉嘅已有所收成。記得游蕙禎喺某同志選舉論壇提到，青政因支持同性婚姻面臨失票，但佢堅持「做對的事」會堅持推動呢啲政策。以事論事，我不得不佩服呢班後生仔嘅膽識。











作為同志選民若不作出回饋，咁佢地嘅犠牲就係全部白費。

最後我想講樣絕望真相：議會已經完全失效。如果單靠議會立法，同志平權同雙普選一樣，呢幾屆都唔駛旨意有大改善。不過我唔係叫你死心唔好投票，只係投的話要根據長線嘅利益去投，由改變香港嘅政治格局開始。政制又好、同運又好、整個香港都好，如有一批人向你要完票，長期又做唔到野嘅話，下屆請換過另一批人去做。

同志仲有開明嘅香港人，喺黎緊嘅選舉應該點揀，其實講到呢度已經好清楚。

http://www.vjmedia.com.hk/articles/2016/08/30/141469/同志，投向新一代/