立法會選舉將會喺今個星期日舉行，今年金融服務界有三個人參選，選情都算幾激烈。今年三位候選人，張華峰、詹劍崙、徐聯安喺香港金融界打滾多年，理應對香港股市玩法、甚至係傳統智慧都相當熟識……不過…事實又係點呢？

噚晚港台播出金融服務界嘅選舉論壇，主持就問三位候選人一條假設性問題：如果我係丁蟹。第一個答問題嘅候選人係張華峰，佢個答案真係估你唔到…張華峰第一句已相當震撼：
「如果我係丁蟹，我就要了解佢嘅業務性質，了解佢工作範疇，了解佢嘅專長。知道佢嘅專長，至可以引導佢發揮專業，為社會服務，我希望對丁蟹呢個人，有多啲認識，我暫時對佢認識唔深，希望有機會睇多啲關於佢嘅新聞，喺佢度學到佢嘅經驗、專長。」
天啊！其實想認識丁蟹呢個人，睇返《大時代》就得架啦！同埋，相信香港嘅一眾股民，真心唔想睇多啲關於佢嘅新聞。

好啦，然後主持就跟進問張華峰，信唔信有「丁蟹效應」。張華峰繼續自由發揮：「丁蟹效應，有好有唔好，好嘅方面，大家要學習；唔好嘅，大家要改變，呢個就係我對人對事嘅睇法。」
其實「丁蟹效應」真係講咗好多好多年，幾乎變成港股魔咒。不過張華峰能夠喺完全唔識嘅情況吓，都仲可以講到咁多嘢，都算係一種技能。
至於另外兩位候選人，答得都係正路，有興趣可以自己搵嚟睇。

https://youtu.be/AWUdjlHE_q0
（第19分鐘開始）

http://hk.apple.nextmedia.com/realtime/finance/20160901/55584572

https://www.youtube.com/watch?v=AWUdjlHE_q0