【獨家】巴西掟煲 難忍花心林作少爺脾氣 麥明詩痛哭認已分手



牛津配劍橋，尖子配10A港姐，客觀條件好登對，但麥明詩同林作這一對，拍拖三年，最後仍是分手收場。本報收到消息指，在巴西奧運期間，身在里奧的麥明詩隔空向林作提出分手，狠心斬纜。及後麥明詩向好友提及感情事時，直認與林作確是手已分，但男方仍極力挽救。講到呢度，麥明詩泣不成聲，矛盾難抉。

日前麥明詩應約與林作見面，被傳媒拍到，大字標題稱兩人甜蜜行街重修舊好，惟麥明詩受訪時表明兩人只屬「朋友」關係；之後麥接受另一傳媒問及與林作關係時，更數度流淚表示：「我真係好迷惘。」又稱：「其實我o依家廿幾歲，好多人都好lost！」

麥明詩一直想低調談情，惟女方當選後，林作卻在陶傑節目中爆出女友是麥明詩，瞬間被炒作，未幾林作宣佈參選區議員，對感情事有問必答，有指令麥明詩為此深受壓力，兩人曾為此齟齬不斷。
另林作雖然深愛麥明詩，惟男方仍有點「少爺仔」脾氣，有時亦令女友難受，加上林作亦不改風流本色，不時撩女，之前本報「爆相爆片」踢爆林作趁女友喺深圳拍無綫新劇時，偕新女Victoria(余穎洋)夜蒲銅鑼灣，令麥明詩對這段情更感動搖，埋下分手導火線。

其實林作亦知有錯，於是用盡方法o氹番女友，不斷懺悔耍冧，又相約麥明詩去番二人第一次約會嘅地方箍煲，但傾傾下麥明詩喊爆，之後更避見林作，又向傳媒明言兩人正在冷戰中，再加多句「勉強唔會有幸福」。兩人關係已然凍過水。

林作母親對呢個未來新抱仔，一直疼愛有加，更豪擲6,500萬買入麥當勞道複式豪宅，準備兩口子新婚之用。眼見兩口子情海翻波，林媽媽即出手拉番埋佢兩個，又捉住林作訓話，一度令麥明詩返轉頭重修舊好呈小陽春。惟上月麥明詩出發去巴西準備奧運節目時，講明係「好事」，稱有一個月時間沉澱一下，而林作當晚亦未有送機。人在他鄉思緒特別靜，未幾麥明詩就透過短訊，正式向林作提出分手。

被問o依家係唔係分咗手？麥明詩短訊回覆傳媒並冇否認，只說：「o依家係朋友。」而林作就回覆蘋果話：「同Louisa有共識唔再講大家，想俾大家空間，唔想咁大壓力！」

http://hk.apple.nextmedia.com/enews/realtime/20160907/55610103