【教主對唔住⋯⋯】
《MyRadio》出咗聲明，會有節目新安排，我一直本著盡量不批評同台主持嘅原則，好多事都忍口唔出聲，今晚好想講少少。
有聽過我主持《素人起義》嘅都知道，我加入熱血公民之前，一直對教主嘅稱呼都係只係黃毓民議員，或者親切啲就嗌毓民，因為我同教主真係唔熟，甚至比不上其他教主嘅支持者。
我唔敢講自己「帶」黃台仰上《MyRadio》，只係建議過幾次必須定時定候做節目，有自己頻道，以及有個本土派「保護傘」，先可以方便其組織發展，於是膽粗粗就去咗搵教主同台長要求開個節目。
教主只係略略知道我喺雨傘革命期間拆大台，人稱「四眼哥哥」，後來有份搞咗個「學生前線」又解散咗，坐過幾日監，全名係「鄭錦滿」都唔一定記得，背景更加冇問過清楚，就畀咗個黃金時段黃台仰同我主持《素人起義》。
教主知道黃台仰同我都官司纏身，生活都有困難，義不容辭，二話不說就度身訂做咗個「月費計劃」幫我地呢啲「街頭抗爭者」。
「月費計劃」初推出時美其名係令《MyRadio》商業化運作，得以長久撐落去。實際上當時急急推出就係為咗盡快支援到黃台仰同我，然後仲要畀襯家借唻攻擊教主「標尾會」，甚至有啲主持後來離開，教主一句聲都冇出過，淨係叫我地做好個節目，訓練下論述咁。
開咪後我多次向教主請辭，教主問我係咪想全退社運工作，我表示想搵返份工過生活，一個月開四個鐘咪嘅月費我自問收唔起，教主再三勸喻如果我真係想退出係冇問題，前題係真係要先搵到份工，生活穩定先再作打算，唔好一時衝動。
後來我被判罪成還柙，教主親身唻探我監，問及我自身前途問題，如果想從政可以再安排崗位畀我，我當時表示不想參與其中，但前路茫茫，不知所措。教主繼續讓我主持節目，並多次在節目中呼籲支持者要交月費畀我地。
後來嘅發展，合照事件一出，被人圍屌果個唔係我，唔關我事我都照頂，女朋友仲同我連夜即去安慰當時受盡壓力嘅黃台仰。黃台仰曾提出請辭，教主挽留佢並且只係叫佢交代返件事，我一齊道歉負責任，去到呢度我都未想過完全割蓆。
真正不能繼續合作原因係黃台仰一直散播謠言，包括「陳雲係共產黨」、「熱血公民資金來源有問題」，以及講教主家事，實在忍無可忍。
我無法接受教主前教主後嘅人喺背後講咁多是非，造謠生事。跟住節目方面話要分開就分開，月費獨立收，教主繼續保護後生仔。
我只能公道地講一句我冇聽過天琦有講過相關言論，亦唔中意參與是非。教主就明知有人背後咁講都繼續撐，我知道唔止我一個人聽過相關言論，講得出就唔怕認，聽過就唔怕講返出唻。
沒有教主嘅《MyRadio》，就沒有《素人起義》，「四眼哥哥」只會喺雨革後收皮，只會喺「學生前線」解散後消失。
老老實實，有幾多支持者係因為主持做好節目而畀月費？有幾多係因為見主持出事而交月費？又有幾多係聽都冇聽過就畀月費？心照啦！
我係有份害咗教主，我覺得好慚愧，一直唔敢公開講，我以為係「大局為重」，其實係助紂為虐，I've got nothing to lose anymore，要搞我就放馬過來！
p.s. 《建國弟兄會》果部份我提都唔想再提，壞人總係企錯邊！