http://video.appledaily.com.hk/mcp/encode/2016/09/12/3157607/20160913_Vvvsub04_clean_w.mp4


Megane兵團三十幾部車齊齊出現，逐架跟顏色泊好位拍照，更花心思砌出法國藍白紅國旗。

現今電子科技發達，縱使新世代自動波箱比手波的速度更快，那又如何？有車主就是愛揸棍波車的操控感。現今連各品牌的跑車都逐步淘汰棍波，進入自動波的世代，這班Megane兵團車迷會會員還是情迷棍波，可以說是末代棍迷。小眾？未驚過，最重要是一班兄弟夠齊心。

香港地買車，雙門車小眾，棍波車冷門，法國車更被睇低一線，Renault Megane偏偏集以上三大港人眼中的缺點於一車。就連Megane兵團會長之一的譚禮軒（Gary. T）當初亦有此看法，「於街上很少見，很多人對這車和品牌沒有太大信心，我當初也是，會問可靠嗎？多唔多嘢整？難唔難買零件呢？貴唔貴呢？」直至被另一會長陳建芬（Gary. C）說服試玩，「其實我都試過對法國車失去信心，因為曾買過Peugeot，幾年間不停壞，幸好揸了四年Megane都冇呢個問題。」二人三年幾前合作成立車會，由起初小貓三四隻，到現在facebook專頁過千人，一星期兩次小聚，每次十幾架車參與，一個月兩次大聚，每次四十幾架車參與，感覺比起其他車會更團結齊心，Gary. C說：「因為買得這架車的人都是真心鍾意揸車，所以我們特別投契啱嘴形，有活動大家很投入，一齊四圍去，相信九成Megane車主都有入我們的車會。」笑言車會甚麼人甚麼行業都有，牙醫、律師、賣燒味樣樣齊，Gary. C就做老師，Gary. T任職港鐵。


車友會帶一家大細出來聚會，氣氛熱鬧。


另一會長譚禮軒（Gary.T）因為喜歡揸棍波車，所以愛上Megane。

買零件改裝平過日本車

能夠團結車會，任職航空公司的Peter可以說是靈魂人物之一，皆因他正是改裝部主管，負責幫車友從英國訂購改裝零件，Peter以專家口吻說：「這部車的原裝配備好齊全，Recaro桶椅、Brembo迫力大鮑魚、Cup Car底盤，車身夠晒硬淨，是一部買回來經已足夠落場玩的車。不過我就是略嫌不夠力，改催化及電腦可以多五十匹，好揸好多，換埋迫力皮已經夠晒。」最大關鍵是他可用原廠約三分一的價錢買零件回來，改催化約三、四千元、改電腦約五、六千元，笑言VW Golf GTI改催化起碼也要七、八千，改裝費用平過日本車。咁着數，一班男人難免更老友。在車會中比較活躍的八十多人，經常會分享改裝零件資訊、駕駛心得。有乜壞，會互相幫忙救車；有乜整，會互相借零件；有乜活動，更會一呼百應搶住幫手。Gary. C說：「我們冇嘢多，兄弟多！成班人感情好是成立車會最大的欣慰。算唔算成功？只能說凝聚到一班志同道合的人。」




車會會長陳建芬（Gary.C、左）和改裝部主管Peter是Megane死忠車主。

有尾轆車特性的頭轆車

今次參加了車會星期日的Morning Drive聚會，共有三十多人出席，場面的確幾熱鬧融洽，成班人你一言我一語，齊齊讚車會兄弟無私付出。問為何鍾情Megane？他們異口同聲說Megane車價三十多萬，毋須大改，既齊料又劈得，操控一流，在市場上難找其他車代替。當中有曾擁有同級的Golf GTI車主，變心的原因是Megane給他們的駕駛感覺截然不同，Gary. T分析說：「起初揸Megane覺得唔習慣，感覺好奇怪，你會覺得控制唔到，成日好似甩住行就炒咁，心諗又話好快好正，都唔係！其實自己用了以前習慣揸Golf GTI的方法。經一班兄弟指點後，知道Megane甩尾時就由得它甩，最重要唔好縮油，便會順住彎道而行，好正！」Gary. C補充：「好多車都有200幾匹馬力，但Megane是一架有尾轆車特性的頭轆車，行得比正常頭轆車快，好少出現推頭，擺尾動作表現更好，因此在過彎時可早一點出彎，亦快好多，連過彎都有這效果，你會揸得好開心。」


被會友一致推舉改得最靚的Megane，車主Keith以紅白拉花粉飾。


Keith的戰車尾翼底部暗藏Trophy拉花。


Keith的戰車裝有Akrapovic碳纖尾喉，有型又能增強性能。

拒買沒有棍波的Megane

車友多次強調Megane不是一架很快的車，而是一架好操控的車，我深信喜歡揸棍波車的車主，大部份已聚集於此。問他們是否非棍波車不揸？Gary. T搶答：「我係！一定要係！」玩過Golf GTI、MINI Cooper、Mazda MX-5，Gary. T對棍波的堅貞卻沒有因科技發達而改變，「今時今日，自動波係快過棍波，拍兩下撥片已經出咗彎，仲使鬼好似我哋咁搞一大輪，不過能靠個人技術控制角度入彎先至有滿足感，喜歡揸棍波的人，就是愛自主性多一點的操控感，這關乎男性動物喜歡操控的慾望。」Peter認同說：「揸自動波好悶，冇挑戰！拖吓波，做吓踭趾先滿足。」Gary. C：「玩車就是要開心，成程車手手腳腳越忙越好。」夠喇，明晒喇，不過有傳下代Megane可能會無棍波，三人頓時一副無癮表情，「唉，我們都有聽說過，仲可能係四門車，某程度上變了一架Golf，真係好失望！棍波單門車就是Megane的標記，沒有棍波的話，我們一定不會買。」讚到天上有地下無，那麼Megane有何缺點？「底盤膠件比較易爛，不過代理維修有樣好，就是三年內包換，當然不包損耗品如迫力皮及極力子。很多車友都是Golf GTI過檔的車主，相比VW售後服務，大家都覺得Renault好得多，的確抵讚。」成班中毒好深，叫他們彈，最後都係讚，我投降。


車主都不愛把Megane改得太誇張，因為它本身已是落場車。


一個月至少有兩次活動，並有車友沿途負責拍照及拍片。


一年會組隊兩次上珠海或肇慶賽車場玩，場面墟冚。

記者：許維雅
攝影：林栢鈞
編輯：謝慧珊
美術：楊永昌
部份圖片由受訪者提供

source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
老左就唔鐘意棍迷