幾時都話做人切忌太有自信，好似早前韓國少女時代前成員Jessica及妹妹Krystal來港出席活動，喺香港機場落機之時，竟然有為數10位全黑西裝嘅保鏢護住，有中有西，位位都目露兇光架。講到咁，以為現場好熱烈咩？原來只係得約20位Fans。保鏢仲要煞有介事咁築成人牆，圍住兩姊妹行，盡顯大明星風采，真係唔知攞景定贈慶。有時真係忍唔住笑！其實今次尷尬未必錯在兩姊妹嘅，始終係公司安排，唔怕太多最怕唔夠嘛。不過，呢個故事就教訓大家，唔好太高估自己嘅重要性，呢啲人總有幾個會喺公司出現架。

暫代阿頭
有啲情況可能老細有一段時間行開，或者辭職走人，繼而會搵一個人暫代佢個位，而通常呢位同事就一定會被權力充昏頭腦，當正自己係真老細，指三道四發號施令，有時連唔屬於自己範疇嘅工作都要管埋，唔好彩自暴其短埋，其實得罪人又搞到自己樣衰，何必呢。

攬上身充大頭
有啲同事明明力有不遞，但係為表現出自己嘅能力，老細話乜都話好，就算係一啲無理要求，例如用好少錢去一個Project，做開嘅同事都知唔得，但偏偏有啲人就話「Ok，交畀我！」總之覺得自己做得到就係比其他同事優勝。結果全世界都唔會幫佢，留名等睇佢失敗。

跳草裙舞
有人成日覺得公司無咗自己唔得，一有機會就向老細表達自己有去意，目的係希望令人覺得自己係搶手貨，繼而加薪升職挽留你。好嘅老細或者真係會加你一次半次，但如果用得太多，老細覺得你苛索無度，一個唔覺意真係「好啦，唔阻你出面發達」。然後唔挽留你，再之後你反而求老細話唔走，仲樣衰！

https://hk.style.yahoo.com/成日以為公司無咗自己唔得嘅3種人-072538412.html