曾經同公司唔同年齡嘅人傾過計，
有意無意會帶到去佔領、政治等問題，
中年人偏向和諧穩定，後生就偏向抗爭。
一直百思不得其解，直至遇到一個中年人。

佢畀公司派咗去北京上海幾年，搵咗個大陸老婆，生咗仔女，而家返嚟香港。
佢成日話大陸同香港冇分別，除咗空氣有啲差同上唔到外國網，衣食住行齊備，隔離鄰舍正正常常，冇乜問題。
我嘗試過話大陸食物有問題，佢就話食貴啲就得。

我唔知大陸生活係點，似乎佢認為衣食住行搞掂就得，唔需要民主自由。
衣食住行是但一樣唔好，都會引致更多抗爭，咁民主自由呢？
衣食住行確實係生存基本，但時勢風雲驟變，點樣先可以快速令人認為民主自由都係生存基本？

我以前諗過宗教形式，但問題係首領一旦倒台、被爆黑材料，就會樹倒猢猻散，難以再起爐灶。
深耕細作教化民眾，又唔知耕到幾時，
倚靠少數精英，又驚民眾畀人出賣，或者畀人重點攻擊/收賣。
多人就慢，少人就難，宗教難搞，理智宣揚理念又難搞。

雖然唔知邊種方法先得，但本土派應該盡快搬一套完整、且大多人支持嘅論述出嚟。
而家又城邦又永續又焦土又自決，變得仲快過保皇黨，本土派自己都團結唔到自己，攞唔出一套論述出嚟 (係一套，唔係多套)。
本土派有大量後生支持者，宣傳力量龐大，而未來佢哋將會操控大量社會資源同平台，所以冇一套主力嘅論述，既不利宣傳，更浪費後生仔女嘅能力同資源。