話說今日我去游泳池游水
一到泳池更衣室我就拿拿臨換完條三角泳褲
急急腳咁衝過洗腳池之後跳落水
點知游游下，池邊無啦啦多左好多人圍住個救生員同個小朋友
本住有花生要食既精神，我當然要去睇下發生咩事
[想蛙式，蝶式都游得咁出色，首先記住...]
哦！原來係係到教小朋友游水
本人對泳術一向深有研究
所以我想聽下個救生員有無教錯到班小朋友
點知我越聽就越唔對路
佢講既野全部都係關於衛生既重要性
當時我心諗，鬼唔知衛生好重要咩，但係關蛙式同蝶式咩事？
唔通洗乾淨自己身上既老泥可以減低水入面既阻力令到你游得快啲？
係依個時候，我察覺到個救生員個嘴角向上翹左一下
我終於知道事情並不簡單
我好有理由相信，救生員特登將錯誤既教學傳授比班小朋友
係為左等班小朋友係將來考救生員牌既時候失敗
無人會搶佢地份工，壟斷救生員既市場
望住班天真無邪既小朋友，我真係唔想佢地比人呃
我向前踏出一步，大喝一聲
[水，並唔係咁游既！ ]
一講完，個救生員即刻心虛咁退後一兩步
正當我想繼續講既時候
遠處無啦啦傳黎左聲[Cut!]
之後就有兩個彪形大漢突擊我左右側
我本能地擺出五形拳之中既鶴形態迎戰
可惜雙拳難敵四掌，我比佢地帶離左游泳池
但我唔會就咁就罷休，我唔會比你地繼續將錯既野灌輸比班小朋友
我一定會投訴你班仆街