講真，教主征戰香港政壇多年，上過庭，打過官司，佢會唔熟司法制度？鳩達再鳩，佢都會識係呢個咁矚目既官司時期，搶下光環，點可能落人口實出去遊埠？

柏洋比人重判 9 個月，全香港嘩然，唔係落井下石，而係熱狗點可能睇住d 狗仔死得咁慘？以後仲有人會跟佢地？熱字頭仲有得撈？

諗深一層，大家有冇發覺有一期d 熱狗打手係咁講「做乜搵雙黃呢？佢地都唔係負責人」，弦外之音，加上種種跡象顯示，一連串奇怪選項都係指向一個人。

冇錯，就係熱普城唯一就任議員鄭松泰。

可能呢d 根本係毛澤東式權鬥技倆，先礙於形勢要讓個位俾你，捧你上去，美其名叫接班，實際情況係一上任連位都未坐暖，就要爆鑊大一大，鄭松泰仲年輕，根本冇諗過「只係搵左當值律師」係一個天仙局，全部責任將要由佢呢個熱血公民總司令一人全背負。

不過好彩，目前熱狗 icon 都仲係雙黃，雖然打手係咁spin，但基本上陷世界都不遺餘力係咁屌佢地，變相鄭松泰未正面受靶。不過或許呢個只係開始，陸續有來，目的就係令鄭完全失去地位，徹底成為扯線公仔，再冇人笑「黃助理」，因為大家會見到鄭「不成氣候」，唯有靠地球唯一本土派、香港唯一政治人物黃毓民插手先搞得掂，下屆紛紛保黃棄鄭。

再睇埋呢期陳雲係咁清黨，連雙 c 達都拎出黎屌，就似係複製緊文革前後既寧左勿右之類，總之要大歸邊，不容二心。點解要咁做？因為鄭要逆境求生、做出業績，一定只能走和平妥協、修正主義之路，即係同其他左膠泛民本民青合作，又傾又砌，否則以佢既論述力同埋號召力，根本屎坑關刀，文又唔得武又唔得，咁斷埋佢呢條路，就更加證明熱普城只能哀求教主、皇上、國師三寶出山，權力更穩。

希望我估錯啦，鄭松泰你自己睇路