張敬軒同關智斌(Kenny)嘅斷背緋聞，唔經唔覺，一傳就傳足10年，想當年，軒仔比Kenny紅，唔少人覺得Kenny拖累軒仔事業，不過風水輪流轉，o依家長期喺大陸拍劇嘅Kenny，終於殺出血路，喺唔少重頭劇中，都穏做二線角色，水漲船高，近日有指佢以2,000萬同英皇續約4年，仲分別喺大陸、香港同加拿大密密買磚頭保值。

不過長期喺大陸掘金嘅代價，就係Kenny同軒仔嘅10年情，終於要忍痛斬纜。今日有報道指，二人由於長期分隔兩地，濃情轉淡，加上早排軒仔成日病，但Kenny又唔喺身邊。思前想後，為咗大家嘅事業着想，軒仔決定同Kenny分手。

軒仔早前宣傳新歌《羅賓》時，已經漏咗口風，講明Kenny唔係佢心目中嘅羅賓：「超級英雄背後都有為佢默默耕耘嘅人，可能係家人或伴侶，但此『賓』唔同彼『斌』，佢(Kenny)最多都係企鵝、小丑……！」

而《蘋果》記者致電軒仔了解，身在廣州嘅佢表示：「唔好意思，我唔答得，問番公司呀！」而英皇高層霍汶希則表示：「非事實的報道不回應。」惟承認Kenny已跟英皇續約，至於Kenny今日喺北京出席劇集《失憶之城》系列《空氣的囚徒》開鏡，同樣冇回應同軒仔嘅分手傳聞。

http://hkm.appledaily.com/detail.php?issue=20161012&guid=55763767&category_guid=7018882&category=instant