Ray有時幫襯完啲餐廳俾意見，都會去社交網站或食評網留言，但呢啲方式都唔多便捷，啱啱知道麥當勞今日正式推出新app「麥麥聽」(My Voice)，專門收集食客意見。大家唔好錯過呀，因為聽佢哋嘅企業傳訊高級總監 林婉梅 (Wendy)透露，初期會有贈品送俾留意見嘅顧客，首輪係蘋果批，但講明先唔係長期有㗎，建議大家快手下載俾意見啦！

對於部分顧客嚟講，贈品可能比較重要，但對餐飲業嚟講，Wendy話呢個app相信已開創業界先河，應該係首個專門收集顧客意見app，比起傳統方式，用app就更能配合港人生活節奏，只要幾分鐘就可以將意見傳到去所屬嘅餐廳，俾餐廳管理層及員工知道，加快跟進速度。

但係對於Ray嚟講，個app夠唔夠user friendly先至重要，所以噚日已率先下載試用。用落都幾方便，首先個app會自動搜尋你所在位置嘅麥記分店，之後只要按各項表現，包括食品及服務質素、餐廳整潔度等評分，最後如果仲有意見或讚賞個別員工，喺空白意見欄填寫就搞掂！
Wendy話個app推出之前，今年1月開始，已經喺全港30間麥記餐廳連續做咗7個月測試，收到超過3萬個顧客意見，77%給予嘅整體評價為7分以上，佢認為反映大家非常滿意，其中有對員工讚賞，亦有說喜歡麥記設飲水機及叉電等設備。

http://www.am730.com.hk/column-333318