最近看了套戲，睇完我有個強烈的慾望──推到佢上正場。

「辛丹斯電影節：香港」放映的《Swiss Army Man》（《救你命3000》）嗰種癲，係火星高智能生物都量度唔到嘅。主角Paul Dano單憑導演講咗句“the first fart makes you laugh and the last fart makes you cry.”就應承咗參演。屁令人笑，明；屁令人喊，原來真係得。電影連環送上屎尿屁勃Ｊ打飛機笑話，卻是碗用料重口味的心靈雞湯，臭嘅，但嗒落甜嘅喂。

流落荒野，殺死你的未必是飢渴，更攞命的是寂寞。尋死的Paul Dano遇上Daniel Radcliffe（哈利仔）放棄輕生，哈利仔係一條屍，係呀，都話咗係好癲。佢個body勁過瑞士萬用軍刀，佢係咁放屁以至入水能浮，仲要高速；出水真係曉出水，仲要係飲用水，而且生火打獵乜都得。真正的逾越了理性，超過自然。我狂笑之外，還本能地低聲唸了十九句「黐線」。


哈利仔（前）話呢套戲係佢從影以來最鍾意，me toooooooooo。


兩人演出超出色，尤其哈利仔要扮四肢無力的呆樣屍體，難度甚高。


在無人叢林有了你，頓覺增加風趣。哈利仔對世界一無所知，打爛沙盆，乜嘢係人生；乜嘢係快樂；乜嘢係愛情，在現實生活有點自閉的Paul Dano通通都要返去起點解構，畫公仔畫出腸講到白一白，偏偏合情合理到無可挑剔。漸漸Paul Dano把自己不敢說羞於做的一切，都推給哈利仔。巴士遇上女神只會偷影？我們用叢林的垃圾，砌架巴士案件重演表白，我扮女神你扮我，白痴到頂點卻浪漫到盡頭，成件事好鬼Michel Gondry。配樂好強，無縫配合情節發展，完場後很想立刻細聽99次。

現實世界容不下的人，需要幻想才能活得下去。Paul Dano與哈利仔，明顯是一個孤獨患者的自我拉扯，是一個人，兩個人格的角力。封鎖與掙脫，沉重到要人下墜的主題，偏偏用輕得會飛的手法去講，太厲害。

去到「癲」鋒，忽爾要回到現實，殘酷到唔想睇，上一秒的浪漫與快樂，一下子被世俗醜化了。前面笑得有幾開心，就要十倍奉還喊番幾慘。Paul Dano勇敢面對自己，女神驚呆了，但爸爸滿足地笑了。係有啲老土，係有啲拖得太長，但還是太喜歡了。

要人愛先要愛自己。為世不容，偏要stay weird，為自己好好的活。

《Swiss Army Man》（《救你命3000》）
導演：Dan Kwan, Daniel Scheinert
演員：Paul Dano, Daniel Radcliffe, Mary Elizabeth Winstead
上映日期：唔知呀，有冇電影公司買呀？

評分：95分

記者：葉青霞

source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
記者起邊到睇，定起到睇