政情：《Pokémon Go》現「支那國旗」字眼

【東方日報專訊】青年新政立法會議員游蕙禎同梁頌恆因宣誓時將「中國」英文讀成「支那」被外界炮轟，風波至今仍未平息。點知風頭火勢下，日本任天堂公司授權嘅手機遊戲《Pokémon GO》，喺沙田一個名為「六支旗杆」嘅Poké Stop內竟然出現咗「支那國旗」四字，引起玩家極為不滿。

有讀者向本報投訴，話喺沙田帝都香港酒店面向白鶴汀街一段，有一個名為「六支旗杆」嘅Poké Stop，遊戲螢幕左上方出現咗「支那國旗」四字。根據螢幕畫面所見，畫面只顯示咗三面旗幟，包括特區區旗，但就唔見五星旗。讀者又話，「支那」係侮辱字眼，遊戲公司唔應該容許呢個字眼出現，而且佢一個月前已要求遊戲公司修改字眼，但就依家都冇回覆。

近日「支那」二字引起軒然大波，遊戲公司如此政治敏感度不足，仲遲遲唔處理玩家投訴，隨時演變成公關災難。