話咁快又到年尾，除咗期待12月嘅假期之外，一眾打工仔最關心嘅都莫過係到底有無人工加或者黎緊Bonus出幾多，少不免成為茶餘飯後嘅話題。最近人力資源學會就做咗一項調查，預計今年員工整體平均加人工3.5％，創六年黎嘅新低，情況差到甚至拍得住金融海嘯時期。學會更指銀行業加人工幅度跌得最犀利，至於零售業能唔能夠走出寒冬，就好有保留啦。不過老實講，加得個2﹣3％，夠我地D窮苦打工仔做乜，單單係呢「三高」足以證明加薪絕對追唔到通脹啦！

OT當食生菜

簽約時工作時間明明係寫住朝九晚五，唔該唔好咁天真，如果老細臨收工先黎一句「聽朝放係我枱面」或者要趕project，咪又係死狗咁番埋位…原來香港係亞洲地區入面OT時數最長嘅地方（其實都預咗），大約有三成人每個禮拜都要加班8個鐘或以上，仲講work life balance？有時間情願訓多陣算吧啦。

交通貴勁貴

一般嘅打工仔，都係搭公共交通工具，每朝除咗要同人迫沙甸魚之外，其實車費都唔平。舊年全球靈活辦公室供應商Regus就做咗個調查，發現全球有超過34%嘅打工仔番工嘅交通費佔收入5%，而香港更有近3成人係高過呢個水平。嘩咪加人工都補唔番？請問「可加可減」個可減去咗邊到？

食lunch食到窮

辛苦搵黎志在食，lunch除咗係填肚仲係唯一可以放鬆放空嘅時候。但今時今日食個lunch都幾甘，以前100蚊都可以食到三餐，但而家就算係熟食中心食個晏坐底都要40蚊，如果你係中環、鰂魚涌呢D商業大區番工，哈哈真係啖啖飯都有血有汗。