給大家分享一個長篇, 希望你們喜歡 22.9.16 大漢



<無題> (暫)

第一場

時: 大早 地: 商廈前地 人: 人來人往，無人識我，沙灘波

我抬頭看着面前高聳入雲的商廈, 後頸一陣酸痛, 只見四字投映半空: 四聖集團。

甚麼投映器材能夠投射半空, 恕小弟暫時無法解釋。簡單來說, 兩個字: 念力。

首先表明身份。對, 我是男子漢，皇上有話兒。朕以二十九歲之齡, 曾經享盡龍床美枕，後宮佳麗數之不盡。好景不常, 某日被奸妃閹奴所害, 雖無性命之虞，然而龍床被奪，每日傳來淫聲蕩語, 作為一國之君, 豈能忍受此等奇恥大辱? 朕忍辱負重, 明查暗訪, 得知城中首屈一指之幫會正秘密招兵買馬, 便前來一看究竟, 假以時日，朕定必浴火重生！

放心，呢個唔係大陸穿越劇。唔明呀​​？條女同個奸夫喺自己個竇口爆房, 唔發脾氣搬出嚟我仲係人嚟嘅？不過搬都要本錢，前題係要搵番份嘢撈先。而出嚟搵撈呢方面呢，小弟確實係有要求嘅，拖下拖下都幾個月...即係大半年...即係成年。鬼叫我個人有原則咩。無業是最寂寞囉。
至於咩所謂念力，就係唔知無準備，淨係知四聖一直研發念力，係咁多。

我伸手按住後頸, 嘗試減輕酸痛。

『好少咁準時喎。準備好未呀？』一把清脆有力嘅聲音喺我身後響起。佢係我大學畢業第一位女朋友，朕過去寵妃。對於我來講,佢有一種過氣同時懶係舉足輕重嘅份量。佢最近改變形象，變得滿臉自信，剪短長髮，染深紅，微捲，皮膚唔知幾時曬成淺橄欖色。雖然佢着住套黑色辦公裝，只見佢全身收哂水，透射一股沙灘排球嘅氣色，就叫佢沙灘波。沙灘波撈人事部，知道要請人就放風俾我。好話嘞。朕有感其誠，咪勉為其難應酬下囉。

​『​​​講呢啲。』我不甘示弱咁回應沙灘波。我呢種人叫Born Ready。朕駛準備？

『四聖全面封鎖外界訊號，你最好熄左部手機。陣間對住大蛇醒定啲呀, 係我推你入去in㗎， 唔好累街坊呀！』沙灘波肉緊自己飯碗多一啲咁話。

乜話大蛇？大蛇朕有一條，叫神盾局長：單眼黑。

『​講呢啲!​​』我一chok自己套全黑老西，神情立flag，昂首闊步踏進四聖集團大廈。