http://video.appledaily.com.hk/mcp/encode/2016/11/28/3218355/20161129_Vvvsub46_clean_w.mp4


在卡拉OK界打滾近20年的Apple姐，事隔十多年再開Big Echo，希望把卡拉OK結合影藝訓練學校，助喜歡唱歌的年輕人圓夢。

依家唱K方便到暈，買支唱K神器自己開concert又得，幫襯全港都有分店的卡拉OK box一樣得。原來人人有K唱的背後，全靠Apple姐（劉麗萍）80年代尾從日本引進八軌帶卡拉OK機開始。「八軌帶冇畫面的，好似個鬆糕咁，放入機內只放音樂，要自己另外睇歌詞唱。」她與生意拍檔開舖賣機及帶，銷量不錯。後來日本開始流行鐳射影碟LD機，她又進貨，卻見當時影碟大多是日文或英文歌，心想要擴大市場，一定要有廣東歌影碟。她膽粗粗向唱片公司買版權。「其實譚詠麟《忘不了你》、張國榮《風繼續吹》都係改編日文歌。既然日文歌LD本身已有音樂，又有畫面，即係只要套上中文字幕，就可以出廣東歌版本。」日本的唱片公司願意跟Apple姐合作，可是他們只提供音樂庫讓她自行挑選歌曲，沒甚麼協助，她要逐一細聽哪首是香港歌手主唱的歌曲。「係咁聽係咁聽，呀，呢隻係《風繼續吹》，就揀出來，好辛苦先揀咗28首歌。」然後她還要人肉按節拍為中文字幕着色，以免大家唱甩beat。「現在就容易，用電腦計一拍兩拍係幾多秒就得。以前係人手拉，有時手震就要從頭再拉。」這張碟成本大約400港元，她批發給拆家是700元，唱片店賣1,350元。1,350元！相當驚人，以為咁貴無人問津？高峰期一天竟能賣出一千張。拆家爭住攞貨，供不應求，但每碟製作需時，Apple姐甚至要親身飛往日本人肉運碟回港，十分誇張。

家用需求殷切，她當然希望推廣至商用層面。當年香港還流行Piano Bar，有琴師為客人伴奏唱歌，Apple姐希望他們願意增設卡拉OK系統，可是器材入場費高昂，沒太多酒吧願意投資，她又想到可以把器材租出。「租機兼租埋個人教佢哋用，一個月收7,000蚊，嗰陣佢哋稱為卡拉OK DJ，會响現場幫他們打碟，教客人用部機。」她自己又在銅鑼灣開了一家卡拉OK Bar作示範，希望讓更多人認識。「坐到70人，用自動換碟機再加大銀幕，係大堂式卡拉OK。」這種唱K模式大受歡迎，幾乎晚晚坐無虛席。「有啲人想唱先，會塞錢畀我哋；仲有江湖中人話自己係邊個邊個，又話要唱先。」門庭若市，引來其他酒吧以相似模式爭生意。「後來有啲吧有人爭唱歌爭到打交，搞到卡拉OK好似好複雜咁。」於是她積極轉型，引入卡拉OK box，原來跟她一次住日本汽車旅館的經驗有關。「嗰度好得意，每間房都有唔同主題，最特別係每間房都有卡拉OK，就諗到番香港可以開一間咁樣嘅卡拉OK。」剛好她認識日本Big Echo老闆，雙方一拍即合。「嗰陣Big Echo响日本只係開咗兩間，啲房好細，好似個電話亭咁，所以叫卡拉OK Box。」首家香港版Big Echo於1991年6月在尖東幸福中心開幕，有34間主題房。以低廉價格吸引客人，連學生哥都負擔得起。「有啲人等四個鐘房都唔介意。」

位於Big Echo樓下的翠麗華餐廳老闆眼見他們客似雲來，於是也有樣學樣，把酒廊間房改裝為卡拉OK，股東、經理紛紛各自加入卡拉OK市場，變出後來的NICAM、加州紅、TOP ONE、 ENERGY等卡拉OK。其中最大威脅的要數加州紅。「加州紅出40萬買蘇永康的《越吻越傷心》獨家試唱權。唱片公司來同我講如果你願意出40萬，我賣畀你，我當然唔肯，要我畀錢，我不服氣。」可是歌曲爆紅，令加州紅一下子搶了不少市場佔有率。「可能食過番尋味，佢哋發現獨家試唱有用，係咁同啲唱片公司傾，然後呢間來問我攞錢，嗰間又來問我攞錢，我都唔肯。」生意大減，Big Echo本來還能維持，可是2003年一場沙士，捲走了Apple姐十多年來的心血。

「交租、出糧個個月都要千幾萬，個個月蝕幾百萬，甚至上千萬，我賣晒所有物業，撐了一年，蝕咗億幾，真係捱唔到。」回想那段日子，她感恩部分大業主願意讓她延期交租，可是公司最後仍要清盤。「後來新港中心業主清我盤，嗰個就係劉鑾雄先生。」Apple姐說得平淡，從高峰掉下，她跟前夫開過日式餐廳，摩打手日日做足10幾20個鐘，簡簡單單的生活反而令她很滿足。

後來她輾轉重回老本行，做跟音樂有關的事，包括搞演唱會、做經理人，也教唱歌，希望助有意加入影藝圈的年輕人完夢。她最近在旺角重開Big Echo，新店有band房、錄音室、綠幕讓人開小型concert、錄demo及拍MV。曾跟秦燕老師學唱歌的Apple姐經過那些年，重回卡拉OK市場，是由於她真心喜歡音樂。她笑言：「我真係好鍾意唱歌，唔開心時唱歌真係會開心啲。」

記者：葉青霞
攝影：徐振國



80年代尾，她將日文歌的原音卡拉OK配上廣東版歌詞，推出LD讓人在家大唱特唱。


Big Echo卡拉OK當年主打主題房，用上Hello Kitty主題的房間吸引不少少女光顧。


source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
唔講唔知