http://video.appledaily.com.hk/mcp/encode/2017/01/01/3244520/20170102_Vvvsub156_clean_w.mp4


他們希望繼承蘇格拉底的精神，profile pic都特別用上蘇格拉底的插畫。

到底有幾多人將「哲學」同「型」扯上關係？然後覺得書櫃上有一兩本哲學書好型，覺得入場睇哲學電影型到裂，甚至覺得只係响Facebook分享哲學家名言都型出國際？係有班咁嘅人，佢哋叫偽文青。

最近有個希望普及哲學的Facebook專頁「好青年荼毒室」，強調要杜絕文青，指的就是這種把哲學當作型人tag的偽文青，不過專頁創辦人強調唔係要大大力恥笑，只係想佢哋真的多了解哲學，變成真文青。李康廷說：「尼采喎，上帝已死喎，嘩，太有型，太反叛，然後表面地去誠品買本尼采的書，飲杯咖啡。我覺得冇人想咁虛偽，問題係冇一個好方法，畀佢哋進入呢個世界。」市面上確有哲學導讀書籍，可惜未必本本深入淺出。

哲學=深奧，相信好多人咁諗。一班哲學研究生於是創立咗呢個平台，發表難度一星至五星的文章，入門、進階、深造一樣得，可以十分認真，同時廿分搞笑。採訪當日，聽佢哋討論「黎明金句」、「點解殺手都有小學同學」，我幾乎笑到要踎低。另一位創辦人關灝泉笑謂：「認真同搞笑唔係對立嘅，我哋都係做番自己。」佢哋會用漫畫同電影去講哲學，易入口，但依然嚴謹。鄺雋文解釋：「想有趣得來合乎學術要求，唔係純為咗紅，post吓啲搞笑嘢呃like。」佢就話難度一星的文章，係希望令冇乜哲學背景的人都能明白。「甚至我媽都睇得明。」伯母係咪真係有睇先？「真係有，佢仲話原來李天命同楊天命咁唔同。」笑咗，但係當你見到書局的「哲學」書架上永遠都有風水書，都唔知好嬲定好笑。洪恩說：「我們讀哲學的人，都未必可以三言兩語講到哲學係乜嘢，的確好難怪大家有誤會，唔明白。」

專頁名稱叫「好青年荼毒室」，「好青年」要「荼毒」，咁矛盾嘅喂？關灝泉說：「一般人覺得『好』的定義就係循規蹈矩，我哋講『荼毒』唔係要教壞人，只係想大家多啲思考。」懂得反省及追問事物之本質，其實已經可以說是進入哲學的大門。而專頁名稱的由來，原來也跟希臘哲學家蘇格拉底有關，原來當年佢被控以「荼毒青年」罪名，最終被判死。鄺雋文謂：「其實佢只係不斷同當時出名有智慧嘅人傾偈，嘗試挑戰佢哋嘅想法。佢最後覺得自己比佢哋有智慧，係因為佢知道自己無知，嗰啲所謂有智慧嘅人反而以為自己識好多嘢，以為自己知道乜嘢係公義，乜嘢係藝術。」蘇格拉底跟人在市場辯論，很多年輕人經過耳聞，因而學會批判思考，惹來當時政權不滿。趁我哋仲有諗嘢問嘢自由，真係要諗多啲，問多啲。佢哋响專頁設立哲學樹洞，都係想鼓勵大家問問題。黎家樂說：「所謂普及哲學，不應該淨係得我哋講，好似上堂咁，否則你去工聯會報個course就得。」佢哋唔係要提供乜嘢答案，只係想引發大家思考，有人嚴肅地問：「人的存在有甚麼意義」；有人搞笑地問：「點解哭泣聲絕無意義」，佢哋一樣來者不拒，落力回覆。

呢班哲學人各有專長，有人鑽研中國哲學，有人專攻哲學史，有人愛用電影講哲學，有人從社會時事論哲學。出文前必先經其他人審稿校對，異常認真，極端仔細。「我哋希望呢個係一個輕鬆得來專業的哲普平台。」你今日被荼毒咗未？

記者：葉青霞
攝影：陳健邦



創立這個專頁的一班哲學系研究生，除了香港，也有在英國牛津大學及德國求學的博士生。佢哋乜都拗一餐，採訪過程真係幾好笑。


他們的哲學文章分一星至五星難度，即使入門級一樣嚴謹。


source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
外國修哲學真係型