曾志偉愛駒「卡加動力」去年喺賽事中意外死亡，令志偉損失7位數字。不過，原來志偉上月搬去大埔新居後立即轉運，喺上月底跑馬地夜馬賽事中，以2600元買連贏及位置Q 3串7中咗1600萬，今日志偉名下馬匹「品自高」又喺澳門爆冷贏頭馬，認真當旺。



曾志偉名下11歲老馬「品自高」今日喺澳門爆冷贏咗頭馬，獨贏派彩$287，但志偉未有現身拉頭馬；呢匹馬服役以來贏過8場賽事，戰積不俗。而志偉過去先後擁有超過8匹馬，包括香港方面自資嘅「卡加小子」、與好友合資嘅「卡加大師」、「卡加動力」同「卡加精神」；澳門方面則有「品自高」、「獎門人」、「放下」和「海洋之心」，但除「品自高」外全都已經退役。


http://hk.apple.nextmedia.com/enews/realtime/20170108/56144128

【1600萬點使好.......】曾志偉開P 豪請獎門人家族日本遊


贏咗大錢又新居入伙，志偉話要請晒啲朋友去日本旅行。（微博圖片）

曾志偉行運行到腳指尾，上月22日成功刀仔鋸大樹，以2600蚊本贏咗1600萬馬仔。據知志偉上月30日廣邀好友到佢大埔屋企擦餐勁，包括佘詩曼、阮兆祥、郭少芸、姚樂怡、梁靖琪(Toby)、錢嘉樂、湯盈盈、洪天明、苗僑偉、戚美珍等都係座;上客。


志偉除搵咗一位私房菜大廚負責當晚美食外，仲預備十幾廿枝十四代清酒、紅酒、威士忌同香檳等招待朋，不亦樂乎，順道慶祝新居入伙。當晚阿佘、祥仔等人有將佢哋開party嘅相放上社交網，但就冇講原來係志偉贏大錢請客囉！


有份參與志偉開心大派對嘅佘詩曼，噚日接受《蘋果》電話訪問時被問到志偉贏1600萬請客？佢笑話﹕「係呀，請咗我哋去佢屋企食飯開party。」當日有冇跟志偉買馬？阿佘話:「嗰日我冇去，我都唔識，平時都係亂咁買，早知跟佢一齊買啦！阿爸(志偉)好lucky，因為佢做得善事多，善有善報。」



身為獎門人家族一份子嘅阮兆祥亦指志偉贏錢，佢話:「大家都好戥獎門人開心，佢話會請晒大家日本旅行喎。志偉啱啱搬咗新居，我哋都話間新屋好旺佢。志偉做好多善事，幫手起好多佛寺，佢又搞咗個『快樂港仁』醫館，幫啲低收入家庭贈醫施藥，今次真係善有善報。」


至於姚樂怡就話飽到棒住個肚走，佢話﹕「我唔知中咗幾多錢，剩知佢贏馬，但最緊要我哋有餐食。」Toby則笑說﹕「如果真係咁多(1600萬)就梗係好啦，我哋冇問，但大家都想好運，如果知佢會贏，我一定買。」

http://hk.apple.nextmedia.com/enews/realtime/20170108/56144094