噚日舉行嘅《2016年度勁歌金曲頒獎典禮》，容祖兒憑《無人知道雙子座》同《我好得閒》奪得「勁歌金曲獎」，不過因為佢同李克勤身在湛江開騷，所以冇出席攞獎，大台安排區永權人肉速遞獎項到佢哋兩個手上。



同時，區永權宣佈「最受歡迎女歌星」得主係祖兒，而佢係第12次攞到呢個獎，祖兒一聽到係第12次攞，佢笑住反問：「哇哈哈！12年㗎喇？」然後佢講感言話：「首先好感激TVB啦，有一個咁特別嘅安排，我知道係好罕有㗎，亦都好感激阿權權你長途跋涉咁過嚟啦，（我嘅榮幸）好希望喺在場嘅所有觀眾都會感覺到我呢一份喜悅，」




克勤提到自己2016年度冇出席任何一個頒獎禮，希望出年會出席番，仲想坐喺祖兒隔籬，但佢臨尾加咗句「如果你仲去的話」，跟住祖兒就答：「啲人成日話我攞太多，咁但係當我見到李克勤都繼續攞嘅時候，我做咩唔繼續攞呀？」佢仲話克勤係佢指標。


數番手指，祖兒今年係第11次捧走叱咤樂壇女歌手金獎，而喺日前舉行嘅港台「十大中文金曲頒獎典禮」中，連續13屆捧走「最優秀流行女歌手大獎」，更係該獎設立以嚟，唯一得獎嘅人。
獎項數目聽落好似係有啲多，不過祖兒睇嚟仲好有攞奬意欲，咁即係……明年再見。

http://hk.apple.nextmedia.com/enews/realtime/20170108/56144914