呢D圖大家睇得多，個個都識話芬蘭好勁、蘇聯好廢之類
但其實由戰略上客觀黎睇，蘇聯初期嘅失敗都係有迹可尋嘅

首先蘇聯嘅戰略同情報出現極大問題，佢地以為芬蘭人唔會認真抵抗
乜都冇準備好就是但啦行啦咁嘅款

一開始芬蘭最南面對住列寧格勒條曼納海姆防線即刻擋住左蘇軍嘅攻勢
呢度邊境窄唔適合進攻，而且條防線係芬蘭精心建設十年，蘇軍嘅攻勢又毫無系統
所以都冇咩需要解釋

係芬蘭東部條邊境就好闊望落好易打，但其實佈滿晒湖、森林、沼澤
係守方打遊擊同設陷阱嘅天堂，而且因為地方大，芬蘭軍可以喺蘇軍攻得深入之後繞到蘇軍後方，切斷佢地補給線，然後餓下佢地先再送佢地去做餓鬼
毫無準備諗住HEA打嘅蘇軍入去咪俾人屠殺
東部同北部攻勢最大嘅威脅喺上面幅圖到都見到，蘇軍打到入Kemijaryi嗰度結果俾一師啱啱落火車嘅芬蘭軍擊退左
不過雖然北面呢D攻勢好失敗但成功引開晒芬蘭所有預備隊

而交通方面蘇聯係幾乎等於零，得一條鐵路支線係入到芬蘭，而芬蘭自己國內就當然唔使講佈滿晒鐵路
芬蘭當時嘅鐵路系統同交通甚至仲發達過位處平原嘅波蘭

蘇軍最穩打穩紮嘅反而係一開始失敗左嘅曼納海姆防線攻勢
佢地一開始發覺攻唔入停左，然後先再集合十四個師集中攻擊芬蘭嘅六師守軍
用砲擊炸爛晒D要塞之後先派坦克同步兵進攻，而空軍就負責阻截芬蘭軍嘅反擊
蘇軍有系統嘅攻勢好快就成功喺防線到打穿左個窿
蘇軍打穿防線之後冇急急腳打上維堡（芬蘭當時第二大城市）
佢地包圍殲滅左防線缺口左右方嘅芬蘭軍先再前進，芬蘭自此兵力耗盡
雖然後來芬蘭喺維堡到都頂左幾個禮拜，但大勢已去



蘇聯開俾芬蘭嘅offer其實真係算君子
以當時個戰況同國際形勢，佢甚至可以食左全個芬蘭或者扶殖個傀儡政權
但佢只係拎左極少地

不過又未必真係史太林太大方
而係因為蘇聯同芬蘭嘅爭執本身只係起源於蘇聯想要芬蘭部分土地黎防禦德國
而蘇聯最初係願意用超過自己所得幾倍嘅土地黎同芬蘭交換
如果蘇聯繼續咁樣喺芬蘭動員同糾纏落去想全面征服芬蘭嘅話就係本末倒置左
反而令到對德國嘅防禦更加虛弱，所以快快手見好就收算