民以食為天，近日觀眾熱捧李家鼎主持無綫飲食節目《阿爺廚房》，大讚鼎爺廚藝頂呱呱，就連有「小杜大廚」之稱嘅杜汶澤都喺facebook開po力讚。其實好客阿澤都成日搞家宴，招呼朋友返屋企食好西，估唔到今年5月開台嘅免費電視——奇妙電視有限公司（奇妙電視），邀到阿澤開拍一共13集嘅飲食節目《杜汶澤食住上》，為開台打響頭炮。




據知阿澤每集都會邀請嘉賓出席，同佢哋互動講飲講食，阿澤又即場示範一味撚手小菜。阿澤噚日回覆《蘋果》時話：「我每集會教一味餸，冇話西餐定中菜，總之係我拿手菜，同大家分享吓，o依家一路搜集緊好材料同籌備緊。」咁係咪好似鼎爺呢？阿澤好謙虛咁話：「當然無法同鼎爺比較，佢高深莫測，我哋呢啲係師奶仔，點同佢比，我純粹煮啲屋企嘢。」



阿澤呢次會碌卡請邊啲嘉賓撐場，佢搞笑話：「咪我喺娛樂圈僅餘嘅朋友，好似鄭中基、鄧麗欣同薛凱琪，都係呢啲。」阿澤話節目密鑼緊鼓籌備中，大約本月尾開拍，奇妙電視希望可以喺節目播出街前拍晒存貨。


中菜


西餐

阿澤會教煮乜嘢正菜？佢話：「除咗我整開嗰啲餸菜外，仲會煮番外母生前嘅家傳秘方，外母最叻煮燉元蹄，同大家share吓，我平日煮西餐多，我拿手係24小時慢煮牛肋骨、薯蓉同麵包布甸，呢啲一定會煮。」阿澤話平日最大興趣係空手道、煮嘢食同攝影呢三樣，所以一直好恨拍煮嘢食節目：「我好鍾意煮，又鍾意食，可惜一直冇機會，呢次陰差陽錯，我對節目班底好有信心。希望做好啲，大家多啲飲食嘢睇，今時今日，食嘢係唯一可以提供大家最大娛樂。」


阿澤平日愛搞home party宴請朋友


呢啲節目往往唱好食肆，偏偏阿澤搞搞新意思：「除咗教煮，我仲會拍吓介紹『劣食』，搵錢好辛苦，中伏好唔抵，我會搜羅城中劣食，希望大家消費時唔好中伏，教大家避之則吉。」阿澤擅煮，有興趣出烹飪書嗎？佢耍手擰頭表示：「好多出版社有叫我出cook book，但我覺得睇影像會容易感受得到。」咁不如搞檔私房菜？阿澤又唔制：「令鍾意嘅嘢商業化咗就唔好。」佢話平日屋企成日搞飯局，朋友到嚟要收錢，磅水五嚿到七嚿不等食好西，佢話：「我不計成本煮正嘢大家食，仲會不扣除成本，將啲錢捐作慈善用途。」

http://hk.apple.nextmedia.com/enews/realtime/20170108/56144722