二十連勝的曹星如，上週在世界拳擊組織最新，超蠅量級世界排名升上第一位。想做世界一哥的，還有二十三歲蘇寶生。他上月在香港業餘拳賽決賽勝出，全場歡呼，寶生咧嘴而笑，接過金腰帶。朋友來恭賀，家人卻不在席。教拳月入五千，三千給了家人，仍被阿爸鬧「仆街仔」。寶生無怪他們，要靠打拳出頭，給他們更好的生活。


二十連勝的曹星如，上週在世界拳擊組織最新，超蠅量級世界排名升上第一位。想做世界一哥的，還有二十三歲蘇寶生。他上月在香港業餘拳賽決賽勝出，全場歡呼，寶生咧嘴而笑，接過金腰帶。朋友來恭賀，家人卻不在席。教拳月入五千，三千給了家人，仍被阿爸鬧「仆街仔」。寶生無怪他們，要靠打拳出頭，給他們更好的生活。


「拳擊訓練有時好孤獨，不過最孤單係，最親嘅人唔支持。對於我打拳，佢哋完全無興趣，唔會同我傾，一嚟就鬧。有次我拎拳擊大專盃冠軍，佢哋都照鬧。細佬待遇好唔同，佢讀到書，阿爸阿媽會讚佢，問候佢。我呢？開口埋口都係『仆街仔』，憎到唔想見到我。阿爸由細到大都無讚過我，自從我認真打拳後，再無嗌過我個名，佢覺得打拳就係黑社會。初初我傷心到匿喺房喊，點解要咁樣鬧我？我唔係你個仔咩？我搵到目標，有夢想，每日都無浪費時間，你哋唔係欣賞我，而係批評我。」

「屋企環境唔好，阿爸做看更，阿媽做清潔，一家四口住公屋，瞓同一間房。我讀書時已經打過好多份工，搵自己生活費同俾家用。而家喺拳館教班，月入得五千蚊，我仍然會俾三千蚊家用，因為有罪惡感，自覺係屋企嘅寄生蟲。即使有時我教少咗班，月入得二千，都會倒貼俾足三千。本來我就無咩消費，最多都係車費，幾百蚊慳住使都夠用。」

「我中四第一次接觸拳擊，係睇日本漫畫《第一神拳》，之後就去上興趣班。原本都只係興趣，直到遇上菲律賓嘅傳奇拳手Luisito Espinosa，我第一位教練，佢教曉我咩叫真正嘅努力，改變我生活模式。」

「教練好錫我，比親生爸爸更親切，全心全意將佢識嘅都教我。做職業拳手要唔煙唔酒，每日練跑，作息定時，飲食節制，佢講咩我都願意做。記得第一次比賽輸咗，我喺更衣室，強忍眼淚。佢輕輕拍我個頭，話唔緊要，好似氹細路咁。我即刻爆喊，覺得辜負咗佢嘅期望。我應承佢，第時如果有成就，一定唔會忘記佢。」

「我高級文憑畢業，讀體育，坐唔定。我入唔到大學，但我深信只要專注做好一件事，一定會有成就。我明白父母關心我，只係方式錯咗。我都有為家人諗，希望將來打出成績，俾佢哋過最好嘅生活。」

撰文：關卓凌

攝影：高仲明

http://nextplus.nextmedia.com/news/recommend/20170113/468439