前新城電台DJ洪朝豐多年前曾患遺傳性抑鬱狂躁症，九八年與寶詠琴一段戀情最為哄動，陷入「豐狂歲月」，佢自2013年起，開始打坐靜修，病情受控制，當紅DJ變成病人，人生起跌猶如過山車，近年佢已心情平復，不時修道打坐。

《蘋果》喺2014年曾影過洪朝豐上堂嘅情況(新聞連結：http://bit.ly/2iFODxP)，原來佢一教就教咗兩年，今日有周刊指洪朝豐原定上年7月移居法國，不過佢最後揀留喺香港，佢去多間非牟利機構教打底班，每位學生收廿蚊，佢亦會分享個人心得，出入坐巴士代步。

周刊報道指洪朝豐教嘅班一堂逾100人出席，一班兩個鐘，教完拉筋同一啲打坐基本功，最尾洪朝豐清唱出《心經》嘅經文就落堂，洪朝豐同部份同學仔傾偈，大方講之前喺泰國修行過程，有患上抑鬱症嘅同學仔問問題，洪朝豐就提醒對方一定要睇醫生同食藥，打坐亦有幫助，要多做運動等，佢仲以過來人身份講只係抑鬱症都好啲，自己係抑鬱狂躁症，突然就好似碌爆晒啲卡咁，破壞人際關係，嚴重好多。目前佢住喺藍田自置公屋，當晚約咗前妻葉桂好同囝囝洪葉打邊爐，未知係唔係洪朝豐一月生日，提早慶祝。現時洪朝豐就去咗泰國禪修集訓一個月，喺嗰邊過埋年!

http://hk.apple.nextmedia.com/enews/realtime/20170117/56183218