http://video.appledaily.com.hk/mcp/encode/2017/01/19/3258286/20170120_Vsub382AD_clean_w.mp4


《怪力亂神碎花裙》，載有短古一百，有笑位有哭點。

導演彭浩翔腦筋應該練過瑜伽，所以啲橋可以720度扭來扭去，曲直任我行。佢最近出版極短篇小說集《怪力亂神碎花裙》，收錄100個迷你故事，忽甜忽鹹，又笑又喊，限量三千本，仲話到明永不翻印！出書賺錢難過去火星，佢覺得出版社應該把書變作精品。「實體書一直當自己只係內容載體，電子媒體又係盛載內容，而且唔收錢，出版社即刻覺得世界末日啦！所以書唔應該無限量印，仲要印得靚。呢個價值讀者就唔能夠download得到，佢就會想儲起呢本書。」今次新作都唔會喺書店賣，只在Facebook專頁發售。雖則賣$150，但出版未夠一個月已經賣咗一半。


彭氏幽默好鬼黑，鍾意就好鍾意，唔鍾意你應該睇唔到呢句。

小說裏面好多故事，佢都曾經响微博或Facebook發表，不過啲故事已經去晒「黑洞」，冇啦冇啦。佢笑住話：「我有公主病，好憎人唔長期關注我，所以故事發表咗廿四小時後，我就會delete。你都唔關心我，即係我刪走都唔mind啦！」

書內故事可以短到得一行，不過少字又唔代表呃錢！「有啲人以為長篇比短篇難寫，其實越短越難。短篇你需要好明確嘅突轉，唔可以有太多形容詞或內心描寫，完全係水墨畫嗰種白描方法。」佢就非常欣賞日本作家星新一。「佢嘅作品簡潔到只有一頁紙，都能做到有畫面有餘韻，令你睇完諗好多嘢！」

思想黑過墨汁嘅佢，硬係要整死好多小說主角。「點解唔諗得極端啲？我同親戚朋友食飯，大家嘻嘻哈哈，我個腦就會飄去諗如果依家有人死會點呢？如果三姑六婆互相殺死大家又會點，我成日諗呢啲。好多人唔會將啲無聊思考寫出來，但我會。」

大陸有網絡審查，佢書內某啲故事都曾因「敏感」內容被刪。「審查唔會影響你創作，你先唔好理嗰啲限制，將你鍾意嘅寫晒出來，我覺得冇所謂，反正我冇收微博錢。」他更加決定任由大家改編書內故事為短片。「只要唔涉及商業活動，鳴謝番呢本書，我就可以免費授權，冇所謂。」Done Studio已快手改編書內故事〈分手信〉，佢亦都有喺Facebook分享短片。

小說論盡KY與WIFI，有啲濕又有啲黑。吞吐，品嘗，口味好重。不過我記得一個叫〈發現頻道沒發現的動物殘酷故事〉，有隻叫拜仁的鴿，唔妥協，好轟烈，死就死。拜仁死得重過泰山。

記者：葉青霞
攝影：劉永發

2017果籽繼續認真知味。識買惜用。行以求知。好事多為。重修舊好。
緊貼果籽報道，即like：http://fb.me/AS.AppleDaily


source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
實體書好野