台慶冇獎 海報冇樣 肥媽怒轟無綫

近年教煮餸節目大受歡迎，連續四年幫無綫主持《食平D》系列嘅 肥媽 ，節目每次出街例必爆紅。榮升收視福將的肥媽，早前更俾足面高層，重出江湖拍劇集《味想天開》，諗住幫下唔夠人用的無綫當捱吓義氣。點知肥媽原來一直被無綫搵笨，新劇戲份被喪cut又冇份宣傳，台慶「最佳節目主持」又冇份！自覺付出冇回報，肥媽同朋友爆粗狂呻，更怒推無綫的賀年節目，一於你不仁、我不義！



自從13年為無綫拍的飲食節目《搵食》大受歡迎後，肥媽每年都會主持《食平D》系列，深受一眾師奶觀眾歡迎。不過節目幾爆都冇用，肥媽同陸浩明呢對最佳拍檔，5年來從未攞過「最佳節目主持」，今年輸俾Do姐不特止，更三甲不入！





豬肉獎冇咗，就連去年出幫無綫拍的劇集《味想天開》，都被安排做新年檔炮灰。但更令肥媽谷氣的，是戲份被大幅删減，飾演波斯公主「何大莉」的肥媽被安排到第十集先出場。肥媽飾演的波斯公主本來戲份甚重，不過後來被cut剩少少，論搶鏡程度肯定不及由頭帶到尾的蔣志光、李國麟等配角。





有傳肥媽拍味想天開時，唔滿意男主角洪永城扮大牌，一度衝入化妝間發脾氣，更寸爆叫洪永城做「洪爺」！肥媽怒轟無綫高層後拒絕為劇集宣傳，監製為咗補鑊，上週五（13日）宣傳時立即整個肥媽紙牌頂檔！



捱義氣落得如斯田地，據知肥媽近日向朋友爆粗狂呻，狂轟無綫「搵佢笨X」！當初無綫搵肥媽教煮餸，肥媽二話不說就應承，之後節目收得不斷添食，肥媽都冇坐地起價。其實大家都知肥媽好多年冇拍過劇，今次佢諗住捱義氣幫手唱主題曲同拍劇，點知被人當老襯！



肥媽回應本刊時表示，最初只係負責唱《味想天開》的主題曲，但無綫希望佢可以演出，所以就捱義氣重出江湖。不過肥媽大呻拍攝時戲份又熱又焗，而且地點偏遠，長時間冇得去廁所，真係急到底褲都濕埋！現時半退休狀態的肥媽閒時登台閒時弄孫為樂，佢強調：「拍劇咪再搞我！」

肥媽百足咁多爪，過時過節同葉麗儀、陳潔靈開騷登台，閒閒哋袋六位數！肥媽近年頻頻亮相教煮餸，儲落大班師奶粉絲，如今無綫得罪肥媽，觀眾分分鐘冇得再睇《食平D》系列喇！

http://www.orientalsunday.hk/最新娛聞/台慶冇獎-海報冇樣-肥媽怒轟無綫/5/