http://video.appledaily.com.hk/mcp/encode/2017/02/02/3267953/20170203_Vsub463AD_clean_w.mp4


Swiss Made手錶要用上瑞士機芯，60%的製作成本要來自瑞士原件，也要在瑞士組裝和檢查。

作為一個品味籽，就算唔媚外，對產地文化都應該要有了解，飲威士忌要識蘇格蘭，訂做西裝最好去英國，而說到鐘錶當然首推瑞士。除了買撈、買P仔，你又知不知原來香港錶廠也有能力做Swiss Made瑞士錶？廖仲恒（Jims）出身自鐘錶世家，自己亦創辦了訂製瑞士機械錶品牌Memomem，就問問佢乜嘢係瑞士錶以及一些買錶心得貼士。

Jims爸爸和兩位瑞士鐘錶師傅35年前開始設廠製作鐘錶機芯，製作電子石英錶機芯起家，8年前開始製作機械瑞士機芯。機芯咪機芯，而且明明香港公司，點解會加瑞士二字？「鐘錶對瑞士好重要，所以做咗好多功夫保護當地產業。當地法律規定，一隻機芯，當中所用的零件成本要有60%以上來自瑞士，兼且在瑞士製作，先可以叫瑞士機芯。不過一隻錶用瑞士機芯唔代表係Swiss Made，可能只係Swiss Movement。」

Swiss Movement代表用上瑞士機芯的錶，但要冠上Swiss Made之名還要在瑞士完成整隻錶的組裝過程和檢驗，另外錶的總成本也要有60%或以上使用瑞士生產原件。有不少錶廠會外購機芯，再在其他國家進行組裝，這個情況就只是Swiss Movement，不是Swiss Made。因此Jims創辦的Memomem也要在瑞士廠房組裝，才能印上Swiss Made字眼。Jims覺得買錶最重要是意義，Swiss Made值不值錢全看用家心境。「你買一隻錶可能係想買間錶廠嘅歷史或者佢哋對美嘅睇法，例如我鍾意寶璣（Breguet），因為我知道佢嘅歷史，知道佢改良自動機械機芯，會欣賞佢嘅機芯設計，但一般人未必知，可能女朋友送畀你隻G-Shock先係最值錢，完全冇問題㗎。買錶唔似以前要睇佢行得準唔準，睇時間用手機喇！最緊要係對自己有意義。」

唔係話叫大家唔追名牌，品牌名氣絕對係意義一種。「可能因為工作需要，有用家覺得買隻貴錶可以簡單說明到身份或者收入，呢個都係理由。」不過他就認為$5,000以下除了日本廠精工（Seiko）、星辰（Citizen）等，歐洲沒有太多好選擇，可以放棄牌子，因應個人喜好決定，所以他創辦的新品牌Memomem也落在這個價位。

$5,000至$20,000的價位開始比較有趣，這個價位可以買到有一定知名度而技術又有特色的品牌。「例如波爾（Ball），大家認識佢可能因上面嘅氣燈，平時錶面有夜光要吸光先會着，波爾嘅氣燈係自然發光，放喺黑暗地方20年內都會繼續着。」另外他也推介新興品牌Bomberg，喜歡它夠另類，全部手錶款都可拆出來變陀錶，設計亦甚有創意，例如以日本武士、賭場做主題等。宣傳廣告更找來紋身性感女郎，於斯文高貴的鐘錶界稱得上異類。再貴的級別，相信錶迷自有一套見解，Jims就想冷門一點推介宇舶（Hublot）。「有啲人覺得佢抄AP（Audemars Piguet愛彼），其實唔係，佢好耐之前到依家都鍾意用新顏色、新設計、新物料，例如你唔會喺其他牌子睇到有牛仔布。」

說到貴錶，常常聽人說買勞力士（Rolex）保值，Jims覺得這說法並不準確。「鐘錶唔似買樓會保值，似車多啲，一戴上手多數跌價，差在跌得多定少，名牌係跌少啲，但真係要用鐘錶投資嘅話，只有個別限定版做到，例如萬國（IWC）出過小王子特別版，市價一、兩年內升了幾倍。」

Jims還建議大家，錶是用來戴的，除了外觀，手感也很重要，揀錶記得落手摸。手錶的打磨很考功夫，角位要線條分明得來又不能?手，過度打磨會太圓滑，打磨不夠又?手兼不夠光澤。經驗豐富的鐘錶師傅多數會用手摸，判斷錶砌得好不好，有沒有誤差。雖然說到尾，個人喜好最重要，不過聽完行內人說法，眼界也大開，買錶時都會心思思睇埋歷史、技術，唔係話怕失禮或者要show off，而係箇中學問都大有樂趣。

記者：司徒港燊
攝影：黃子偉、徐振國


Jims自小在鐘錶工場和國際錶展周圍走，在旁為做了60多年的鐘錶師傅陳伯。陳伯指當年香港是瑞士打算進軍東方市場時第一個落腳的地方，他已是第三、四代師傅，香港鐘錶業甚有歷史。


除了幫手家族生意，Jims也開創了Memomem品牌，用家可以自訂配色、錶面款式、刻字，合乎正統Swiss Made規格，售價$3,999。facebook：memomemwatch


自動機械錶的機芯是靈魂所在，但其實有能力製作機芯的廠商不多，主要集中於瑞士、德國、日本、中國。

source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
又後佢