(credit: SMBC comics)

(上回提要) 之前篇文《量子力學，真實存在的異世界》講過吓乜嘢係量子力學同入面嘅基本原則，介紹左薛定諤的貓，大家仲記唔記得? 簡單重溫吓，量子力學嘅世界就好似當勞侵同佢團隊所講「除左真相同謊言之外，仲有樣嘢叫另類真相(alternative facts)」 、仲有啲政府官員話「傾同唔傾中間有好多討論空間」咁 ，結果唔係絕對。雖然好似好荒謬，但唔同強國/當勞侵邏輯，呢個的確係微觀世界量子力學入面嘅真理。

用中學知識睇出點解需要量子力學[/size=4][/b]

一般人第一次接觸量子力學都會覺得好奇怪，接受唔到。始終我地平時嘅宏觀世界、見到嘅野都係同牛頓力學吻合，好難一時之間改變舊有觀念。唔通量子力學真係咁難以接受? 又未必嘅 其實只要用一啲中學知識，簡單推論一吓就可以睇到牛頓力學喺微觀世界係唔適用，需要用量子力學 (好似係)。

試想像一個中學喺化學/物理課堂學嘅簡單原子模型(香港而家唔知仲有冇教)



老師通常都會教大家個模型就好似地球圍繞太陽公轉咁，粒電子圍住原子核轉，呢個係20世紀初盧瑟福(Ernest Rutherford)提出嘅模型。但其實如果你認真諗吓，咁嘅模型係牛頓力學下係唔work架! 點解? 因為任何圓周運動都係有向心力(或者啲人成日錯誤講嘅「離心力」[1] )，亦即係有加速(acceleration)。咁一粒有電荷嘅電子加速緊會點? 咪就係會釋放出電滋波，亦即係粒電子會有能量損耗。所以呢個模型係唔會穩定，而依樣就係可以簡單睇到牛頓力學喺微觀世界唔再適用嘅證據。