每個家庭都是鬥獸場。子女對父母不耐煩、父母對子女苛刻。鄧小巧經常自嘲，不願黐雙眼皮膠紙，便自誇「冇黐都係咁靚」。但她的自信得來不易，「我媽成日都話，你睇吓你條象腿、你啲皮膚、你啲鬈毛⋯⋯話你都算，仲要攞你同隔籬屋七姨婆個仔去比較。」「有時自信可以插到落谷底。以前讀書有段時間唔自在，唔敢講自己真正諗法，舉手投足都唔係自己。直到呢兩年上咗軌道，做自己鍾意嘅嘢，自信就喺度。」



在未有觀眾批評之前，她在家中已飽受眼冷眼，「以前我喺歌唱比賽攞第一，同學都戥我開心，冠軍喎。」爸爸瞄準發炮，「唱歌攞第一有咩用？讀書攞第一先有用。」「我耿耿於懷。有一年，我真係考第一。佢又話：今年攞第一，出年就唔係你啦。呢句說話，我到死都記得。」「我同自己講，佢唔係有心，甚至唔關教育程度事。佢哋嗰代，可能鍾意用激將法。但其實有好多壞處，我到而家仲有心魔，自動波會同人比較。有乜好比呢？每個人係獨立個體，唔同嘅成長環境，造就唔同嘅quality。」



一四年，鄧小巧終於找到反擊的機會。她在陳奐仁推薦下，參加《中國好聲音》，入了廿四強。在上海拍攝期間，她請爸媽去現場觀戰。但爸爸還是那一句：「唔好比賽啦。正正經經去教書啦。」「老豆，你三十幾歲時由深圳偷渡嚟香港，唔危險咩？你選擇你覺得啱嘅嘢，其實我都係。」鄧爸爸文革期間來港。在某個年三十晚，沒有留下片言隻字，便丟下妻兒離家。事隔數月，才寫信、寄錢回鄉，「如果事先張揚，媽一定會阻止。」自此他對鄧小巧唱歌，沒有再說什麼，「我諗我有責任令佢哋明白。好難用片言隻字解釋你做緊乜，但盡量唔好令佢哋擔心。」

http://nextplus.nextmedia.com/news/latest/20170210/477209


父母要求轉行 鄧小巧：人生應該係獨立


今年叱咤頒獎禮，主題是「點解做音樂咁窮」，大致解釋了現代歌手的生存環境，「我媽去完叱咤，忽然淡定咗好多、好似明白咗發生咩事。」鄧小巧出道九年終於獲新人獎，在台上向工作夥伴道謝之餘，也向父母道歉，因為自己多年來都沒有俾家用云云。就像學校的頒獎禮、與家長日掛鈎一樣。樂壇不再是銷金窩，反而變了家庭作業。



台上還有若干與鄧小巧同病相憐的行家。欣宜聲淚俱下，說「好多人叫她回去讀書、不要唱歌」 。問題來了：窮家孩子不應唱歌，有家底的不應唱歌。誰做歌手？「總之唔係自己仔女就得。」


鄧小巧是孻女，對上有三名兄姊。家庭重擔至少有人分擔，「唉，我唔知。可能華人社會就係咁。喺外國，父母供書教學到十八歲就完。其實我都係喎，讀大學、自己養自己。對我來講，人生係好獨立嘅。當然，我都想幫補屋企，至少令我媽有安全感。」

http://nextplus.nextmedia.com/news/latest/20170210/476331