無綫實況節目《有樓萬事足》成為網民熱話，但被訪者Paul Lam看過部分節目內容後，怒轟無綫作大。


物業按揭貸款公司老闆Paul Lam表示：「唔係我作大，tvb作大！」


Paul指其致富之道不外乎儲錢，又認為年輕人不會儲不到首期。

物業按揭貸款公司老闆Paul Lam表示：「我嗰集星期四（23號）播，我已經睇咗啲。」對於被指有十個物業揸手，他非常不滿：「作大嘅，唔係我作大，tvb作大，有啲嘢唔係我講嘅。」

他狂插內容斷章取義：「全部將啲嘢斬件，佢係咁迫我哋講嘢，不停問你係咪覺得唔買樓好蠢呀，我已經講咗話唔係，佢全部斬晒去。死都要問我，咁係咪即係要我咁講呀？係咪咁講就爆啲？咁嗰句佢就斬咗出嚟播。」

Paul小時候在廟街居住，父母擺地攤做小販為生，他強調自己沒金鎖匙，但認為：「財務自由梗係重要啦！」

為達到目標，大學經濟系畢業後，他曾同時做兩三份工，試過返晚九朝六睇美市，又試日間做股票行，晚上去大學教夜校。

他自言搏命搵錢：「打工儲到錢做生意，做生意唔得，之後返去繼續打工，打工儲到錢就繼續做生意，做生意唔得又再打工。早段慳啲，到後尾你可以財務自由快啲，唔好使咁大年年去三五次旅行，劉鳴偉講嗰啲其實好合理。」

他指其致富之道不外乎儲錢，又認為年輕人不會儲不到首期。

「好簡單，四百萬一個單位，首次買樓仍然可以借九成，你都係放低四十萬。唔會搵唔到首期，個個使晒咪冇囉，搵兩三萬一個月，年幾兩年就有首期。」

http://nextplus.nextmedia.com/news/latest/20170220/480423