問埋晒d無聊問題 學童自殺潮又黎，問下佢有咩辦法/政策解決啦

特首參選人曾俊華，接受《蘋果》專訪，呢個咁緊要嘅機會，我哋當然會同市民分享。今次誠獻「人人問John Tsang」，同你講愛情、講地鐵、講豆腐火腩飯！

Q：曾俊華先生你除咗用facebook之外有冇其他途徑可以知多啲青少年嘅諗法呢？
A：落街同啲人直接傾計，會有人直接寫信。

Q：我想問你（如果）你係1200人選出嚟嘅行政長官咁你點樣回應七百萬人嘅民意呢？
A：立法會係一個途徑，網上留言，或者直接寫信。
Q：上你官邸得唔得？
A：呢個冇問題，總有機會。

Q：我想問（如果）你上任會唔會繼續派錢呀？
A；要問吓財經司先得。

Q：我想問你，其實你之前做財政司司長嘅時候，有咁多人唔滿意，有咁多批評，點解你仲咁有信心去選特首呢？
A：呢個都係初衷嚟，我個初衷都係服務香港市民，香港呢個階段係一個需要和解嘅機會，我相信各方面可以享受一段穩定、平和嘅時間。

Q：薯片叔叔你好，你覺得回購領展困難啲，定推動香港真普選困難啲？
A：兩個都困難。

Q：我想問吓你識唔識搭地鐵㗎？
A：識，點解唔識，依家我呢個年紀，2蚊我都答到啦，我會搭好多地鐵。

Q：聽講你好打得，你除左識耍劍仲識咩功夫？
A：幾打得，我唔可以講好打得，呢樣嘢有版權。除咗耍劍，我學過洪拳、詠春、南螳螂、不過都係玩。

Q：薯片叔叔你係咪鍾意食豆腐火腩飯？
A：幾好食，不過要伕餸啤酒，我嗰日上東菇亭度食，冇飲到啤酒，因為做緊嘢，但豆腐火腩飯加啤酒係好嘢，要青島。

Q：John Tsang，你認唔認為有樓先追到女仔，你當年點追你老婆？
A：緊係唔係啦，靚仔最緊要。
Q：你當年係咪因為靚仔所以追到女仔？
A：我諗都係好重要因素。

Q：你當年點追你老婆？
A：不容易架，但我相信要真誠啦，Work架！

Q： Uncle John，聽講你做過梁山泊與祝英台，應該有唔少演戲經驗，唔知有冇識過戲假情真，墜入愛河
A：一次，同老婆一齊，咁就40幾年啦。

Q：薯片叔叔你最鍾意食邊隻薯片呀？
A：我諗都係唔好同人賣廣告。

Q：約翰，你當選後會唔會做蘋果訪問？
A：考慮吓啦，因為佢哋都幾認真，好難答，如果應承我下次放鬆啲，唔好問埋啲咁嘅問題，我會考慮。

Q：曾俊華先生如果你做唔到特首嘅話，你會想做啲咩呀？
A：我希望可以湊孫多啲，用多啲時間去湊孫。

http://hk.apple.nextmedia.com/news/art/20170222/19936541