【文化籽：果籽影評】
跑跑跑跑，殺殺殺殺殺殺，跑跑跑，殺殺殺殺殺殺殺殺殺殺殺殺殺殺殺殺殺，完。乜嘢電影係呢種套路？喪屍片！人類Vs喪屍，總係一場又一場賽跑，一場又一場殺戮。新意可能來自喪屍造型、戰場地點，但都有路可捉，總之官能刺激為上，刺激到心臟病發為上品。年前《熱血喪男》（Warm Bodies）講喪屍談情，會怕凍會心痛，都算破格。今次呢套英國電影《創世魔劫》（The Girl With All The Gifts），再出乎意料十倍，講有智慧的喪屍後代，屍變真菌仲可以結合植物借空氣傳播，真係諗吓都驚。喂呀，意念咁正，個中文譯名可唔可以有水準啲？「創世魔劫」真係九唔搭八七六五四三二一，十個唔知想點，齋睇名真係吾不欲觀之矣。

開首只見小孩坐上輪椅被鎖起去上古怪課，懸念，係懸念呀！有啲驚有啲震，好多好奇好多期待，疑團終於解開，呢班細路非一般，嗜血肉，人類與他們共存要在身上噴「阻擋膠」，減低血肉之軀對他們的誘惑。零舍醒嘅黑人細路女美蘭妮，當正老師係聖母。老師對班小朋友的極致愛護，去到願意犧牲有光環地步，到底係因為乜，冇解釋。係有少少kick住，但電影仍然可觀。Keep住班細路唔殺都係為咗做實驗，研發拯救人類疫苗。阿博士嗰種鍥而不捨好乞人憎，但又大大增加咗佢同美蘭妮嘅矛盾，令後段更有戲味。


大愛老師與別不同，不歧視異類小孩，但光環太大，有點看不透。


美蘭妮本來安份守己，從不追問為何要被關上，禮待把她當怪物看待的軍人。


博士（左）一心利用進化喪屍後代培植疫苗，認為喪屍應為人類犧牲。



美蘭妮在逃亡過程不斷幫人類脫險，與一般喪屍片的設定大不同。

奇特基因救全家
本來囚禁異變喪屍後代的軍事基地失守，喪屍來襲（冇乜官能刺激㗎咋，唔好太大期望）。求救路上得番兩個軍人、大愛老師、美蘭妮同博士。同路人中有喪屍都咪話唔驚，但偏偏佢一次又一次用奇特基因救全家，由被綁起被勒令戴面罩，到lead住大家佔上風，都可見電影創新破格。
中間情節略有拖拉，不合理位也有三四五六個，唔係飽暖先思淫慾嗎？何解幾本鹹書就令軍人放下警戒？不過嗰種末世feel配樂真係值120分，加上結局勁到爆，令人一秒就唔記得前段不足。異類覺醒，當頭棒喝，美蘭妮對博士的詰問，係對自私心理的鞭笞，將個反思位「隊」到觀眾面前。最後一幕呼應開首，黑過墨斗，好頭好尾唔係易㗎。如果字典要解釋「峰迴路轉」，可以收錄呢個神結局。


黑人小演員演技純熟，好癲。

《創世魔劫》The Girl With All The Gifts
導演：哥林麥卡菲
演員：珍瑪雅德頓、格蓮高絲、珊妮雅娜紐娃
上映日期：2/3
評分：80分


記者：葉青霞
編輯：陳禮康
美術：楊永昌


source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
乜戲來