解放軍殺上美艦　
美軍「避走」葵涌

一班解放軍登上美軍軍艦，美軍全程陪住佢哋喺甲板參觀。劉漢權攝

大家噚日中秋去咗邊？維園睇膠燈？定係去沙灘賞月？負責維護國家主權嘅人民解放軍就去咗尖沙嘴，不過唔係掃名店購物，而係玩船P。八方噚日午飯時間食飽飯冇嘢做，走咗去海運碼頭觀摩近日訪港嘅美軍兩棲攻擊艦「好人李察號」，點知俾八方撞到一班解放軍登船。
大約七、八個解放軍，喺美軍陪同下，喺軍艦甲板停留咗一陣。佢哋好似內地遊客去到金紫荊廣場咁，舉晒相機影相，特別係經過魚鷹機嘅時候，影咗唔少寫真。
中共傳媒最近多次發文攻擊美國政府，先有《人民日報》批評美軍，喺未獲聯合國通過就想出兵敍利亞，後有《環球時報》向美國駐港總領事夏千福發出嚴厲警告，叫佢收聲唔好干預香港政改。點解呢日又會咁friend，派軍登艦暢遊呢？


解放軍對美軍兩棲攻擊艦「好人李察號」嘅魚鷹機好有興趣。
美軍落區派福袋畀長者
其實呢類中美軍方交流都唔係第一次，今個月初，根據中國海軍網報道，中國北海艦隊軍兵訪問夏威夷珍珠港美軍基地，當時解放軍都有上到美艦伊利湖號導彈巡洋艦參觀。據報道話，當時美軍只係例行公事咁介紹完艦上武器設備，對於所有提問，回答都係「我唔知道」。哈哈！唔知駐港解放軍噚日參觀好人李察號，會唔會享有同樣待遇呢？
至於好人李察號嘅美軍噚日就四出活動，一批官兵去咗葵涌，在義工團體耀陽行動安排下，探訪一班獨居長者，仲帶備福袋送畀公公婆婆，裏面係大米同罐頭之類。仲有一批中學生陪住班美軍，幫手做繙譯。