http://video.appledaily.com.hk/mcp/encode/2017/03/07/3293408/20170308_Vvvsub390_clean_w.mp4


祥哥口述自己的童年，Maggie同Tony就將之化為微縮模型重現眼前。

「這間舖應該是1959年，那時我都有14歲嚕。」奇華餅店第二代傳人黃錫祥（祥哥）取出私伙放大鏡，彎腰對住1:12的餅店模型細細睇，「你睇個雞仔餅、月餅還有字。酥皮上面有酥?㗎！」奇華旗艦店在灣仔一座樓高三層的三級文物開幕，餅店保留着建築物三十年代的外觀，以及原裝大門，翻新重裝。祥哥特意請兩位微縮藝術家，製作兩個分別1:12及1:42的1959年餅舖微縮模型，幾十盤嫁女餅、月餅同菠蘿包，裏面看到自己的小時候。

話說奇華餅店於1938年開業，初時專賣進口糖果餅乾與煙酒。日戰時期，哪來的來佬餅，好些餅舖結業，他們開始製作自己的包點，度過了最艱難的日子。模型櫥窗餅櫃裏，尾指甲般大的來佬糖果同餅罐整齊排列，「以前除了自己產品，還賣奶粉煉奶甚至煙仔洋酒，汽水都有賣的。舖頭後面有個冰櫃，擺個西瓜落去，好快就雪凍了！」

「啲夥計曉特技的，那些在玻璃樽內的瓶乾、杏仁餅，統統鋪好餅面向外。我都唔知啲夥夥計點鋪的，看他們打斜擺個樽喺地，坐喺地一個個咁排。」那時相信百分之九十的店員及包點師都是男人做的。穿着圓領白T-shirt，冬天加件外套。要買甚麼指給他看，他就拿給你，好好服務的。

不過，八十年代有間西餅舖推出餅卡後，西餅漸成禮餅主流，唐餅餅店幾乎淘汰，祥哥覺得無可厚非，傳統餅家其實多年來都沒怎麼改進，遇着新進的西餅，賣相同價錢都被比了下去，「唐餅裏又蛋黃又蓮蓉做餡，一斤得四個，西餅輕飄飄的，一斤有好多件呀！送禮壯觀又好睇。比較之下，唐餅就貴，甚麼包裝都沒有，就一個紙袋入六個四個入去。當你停在古老年代，又有新嘢出品時，就會覺得對方潮啲名貴啲。」他們也在八十年代將唐餅重新包裝，九十年代，月餅罐上的嫦娥都換做貴格皇帝，「老竇問，做乜換走我個靚女，變咗麻甩佬呀？」就係祥哥換的麻甩佬。

以前的人很講究良辰吉日。每到過大禮吉日，男家把過大禮的盤呀、生雞、生魚、豬肉、甚至豬頭都搬到店裏，用他們的運送箱載好，連同禮餅，乘餅店的小貨車一口氣送到女家。雙春兼閏月的黃道吉日，一日可以出車廿多回，店裏七國咁亂，「那些雙腳被綁的雞跳出紙袋，搞到一地雞屎，夥計邊做邊抹。」不過，時至今日祥哥都唔想再見到舖到一地豬頭同雞屎。但深深覺得，有餅卡以前，人們親手送餅，人的關係較緊密，「唔知點解以前啲人總係多時間過而家啲人。派餅卡裏面都夾埋封回禮利是，禮都未收就回禮，怕唔記得。而家乜都化繁為簡了。」現在一家人坐着吃飯人人在篤手機。老人家都相機先食，拍了相片傳給遠在海外的孫仔孫女。「有好有唔好啦，把近的人推遠了，把遠的人拉近了。」


微縮模型回到未來
話自己愛砌模型的祥哥，說他曾去過微縮模型展，勁開心，睇咗三個鐘腰骨痛，所以今次找陳慧姬（Maggie）與黎熾明（Tony），幫他重塑童年。「我同Tony合作咁耐都未試過開七個鐘頭會！」Maggie笑說，10月計劃開始時，他們跟祥哥開了兩日會，對着大叠五十年代相片與資料，聽祥哥講口述歷史。

他倆做了十多年微縮模型，港式舊樓、魔星嶺住屋群、大坑舞火龍，精工令人讚嘆，但最緊要，是將上一輩腦裏懷念卻糢糊，或只能從黑白相中懷念的生活點滴，重組再呈現，「以前整嗰啲場景，我哋都經歷過。但五十年代真係冇。而且我哋腦裏諗嘢係要3D的嘛，所以找了好多好多資料，日睇夜睇，直頭要將自己塞咗入五、六十年代咁。」負責大型結構的Tony仰天長嘆。負責做粘土微縮模型的Maggie：「你知祥哥係製餅專家，對火色好有研究。有啲餅個色唔夠，我就再做。」看她把泥膠混色，搓成圓餅，然後用針一點點刺，刺出餅裏的花紋及刻字，製成餅模，「刺一個要三小時啊！」雕到頸梗膊痛眼朦朦，但是祥哥一有疑問：「呀以前仲有個秤㗎！」「嗰陣時有白兔、瑞士糖。」有曾在上海街餅舖工作的老街坊，同佢哋講「以前奇華晚上關閘，還有員工在店裏留宿。他們會在鐵閘處開洞賣方包，客人說那時候救了很多半夜肚餓卻買不到食物的的士司機。」

不用誰人要求，兩人「吓？」一聲，但自動記住整樽瑞士糖、整磅白麵包、一磚一瓦一個窗花，路過的老街坊駁句：「係呀係呀，以前真係咁㗎！」見他們反老還童，兩人就開心晒。

記者：陳慧敏
攝影：伍慶泉

2017果籽繼續認真知味。識買惜用。行以求知。好事多為。重修舊好。
緊貼果籽報道，即like：http://fb.me/AS.AppleDaily


祥哥首次看微縮模型展，看了三個鐘腰骨痛。今次自備私伙放大鏡慢慢看。


當年奇華必備的龜包，加了奶粉有淡淡的甜，買一個畀細路哥返學食，已經好開心。


酥皮嫁女餅同老婆餅上，真的有點層層「酥皮」的感覺。


祥哥特意添加的嫁女物品，有生雞，有魚，好熱鬧的。


Maggie埋首雕餅，甫士一直唔變：「對眼真係開始矇喇。」


櫥櫃裏的英式糖果，他們在網上搜了好久，要確保包裝沒有搞錯年代。


以真雞毛製作的生雞。


Maggie埋首雕餅，甫士一直唔變：「對眼真係開始矇喇。」


晾曬的衣服，天台聊天的人群，祥哥邊看邊說好細緻。


門口的小貨車，會載着嫁娶的親友一起去過大禮及送餅。


祥哥強調要他們重塑紅色人力小貨車，說當年上海街有好多這樣的貨車仔來來往往，所以一定要有。


50年代上海街店舖的外觀。


雙春閏月、良辰吉日、中秋及新年，舖頭就係咁樣。今時今日雖然盲年都有人結婚，但擁擠情形都不一樣了。


source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
咁好玩