90後梁焯霖每日搵陌生人傾偈，認為每一場偈都似經歷對方一生。


實行計劃後，佢有思考過點解日日咁好彩，每日都有奇遇。最後佢發現，係因為每個人都特別。


文章相當仔細，記錄對話內容，也有個人睇法，值得追看。

「你幾適合做記者。」呢句我講嘅，對象係受訪者梁焯霖。佢兼職做剪接及演員，剪接過電影《點五步》，演出過ViuTV劇集《三一如三》，佢最近開咗個facebook專頁「陌樂偈」，食晒字咁，佢每日逼自己搵一個陌生人傾偈，再將對話寫低上載專頁。樂？係快樂嘅，如果場偈傾得成。你估易呀？你試吓……你試吓……你試吓，開口前包你冒冷汗、心亂跳、口狂震。「猶豫開唔開口嗰段時間最煎熬，好似同女仔表白咁，但原來只要勇敢少少，睇番轉頭又冇乜嘢。」心理關口衝破後，佢依家講得輕鬆。回想第一次佢喺巴士上層搵目標，佢糾結咗好耐，喺不同座位來回視察，最終佢成功同一位中年護士傾偈。

（我覺得）做記者要傾偈叻，佢係叻嘅，但嗰種「叻」指嘅唔係技巧；（我覺得）做記者要支筆好，佢係好嘅，但嗰種「好」唔係講筆鋒。佢寫嘅千字文，咬開每個字都有感情，好真誠，令人好想追看佢今日又遇到乜嘢奇人。「我初初以為唔係每場偈都值得寫。我每次傾完會寫低啲對話重點，我睇番發現，大鑊，每日都好值得寫。之後我就明，道理好簡單，因為每個人都好特別，冇人係平凡嘅。」

喺街突然被人撩傾偈，你都咪話唔驚。「好多人擰頭然後直接走開。有啲會好驚訝問我『點解呀』、『傾乜呀』，有啲會問『你邊間教會』。」咁面懵，堅持係為咗對以前嘅自己有個交代。「呢個諗法好多年前已經有，舊年年尾喺部舊電腦搵到張『我要做的計劃』清單，打開見到第一項就係『我要跟陌生人聊天』。我覺得好對唔住以前嘅自己。」新年新希望，就當係2017大計，順理成章，但佢唔想再拖。「好似當年咁想遲啲做，結果拖咗六七年。有啲嘢你依家唔即刻做，你以後都唔會做。」

大家都中咗毒，手機毒。低頭族不自覺地對身邊事情漠不關心。「好想將陌樂偈推廣開去，好記得有次有個老婆婆落巴士，石壆有一級佢要走上去，車站好多人來來往往，但係冇人理佢。佢哋留意唔到，就係因為只顧睇電話。我就走埋去拉佢上來。」無心插柳，呢個發咗霉嘅計劃，似乎更適合依家實行，佢希望人與人之間有多啲真實溝通。

同佢萍水相逢傾過偈嘅包括香港小姐、專欄作家、精神病患者、懲教署職員、健身教練。想知佢仲同過乜人傾，有乜奇遇，請留意另一則動新聞。

記者：葉青霞
攝影：劉永發

http://hk.apple.nextmedia.com/realtime/supplement/20170311/56410974

佢Facebook Page Link: https://www.facebook.com/ChatToStranger/