http://video.appledaily.com.hk/mcp/encode/2017/03/13/3298065/20170314_Vvvsub508new3_clean_w.mp4


舊天橋能拍出懷舊味道。
地點：北角春秧街街市附近天橋

旗袍係用來懲罰貪吃女人嘅，只要肥一分就無資格着，我覺得。「嫣裳記」店主翁婷婷（Ding）反而認為身材豐滿，穿旗袍才好看，有小肚腩？無問題。嫣裳記出租花樣旗袍，讓大家發掘襯絕旗袍的靚景拍照。異國民族服人人着個不亦樂乎，租件靚旗袍，一樣可以來一趟在地小旅行。

「我好怕旗袍好《情深深雨濛濛》。」旗袍好鬼弔詭，娘爆與典雅只係一線之差。讀時裝設計的Ding眼光唔錯，店內的確無「情深」款，棉布質地旗袍飛俗氣走老土，圖案有小清新的花卉與格仔，也有活潑的七彩波點及幾何線條。刺龍繡鳳、絲質大花，統統找不到。從上海引入的旗袍感覺年輕，唔會着咗立即老咗十歲咁冤枉。

「好多女仔去日本着和服，去韓國又着韓服影相，我覺得旗袍都好靚，點解無乜人想試着呢？」Ding去年到日韓旅行，都有入鄉隨俗，但她覺得和服、韓服層層叠叠，穿着有點困難，而且也遮蓋身材。反而旗袍顯露曲線，更好看。「十個女人十個都覺得自己肥。有時反而你以為要着大碼，其實中碼已經啱身。我哋有齊細碼至加加大碼旗袍，唔使擔心唔啱着。」三心兩意人之常情，款式眾多，沉溺衫海的迷途女生可以揀兩件滿意的旗袍，試上身合心水那件才租走，借出旗袍後每件都會乾洗。


這幅唐樓壁畫已成景點，穿簡約淺色旗袍不妨來取景。
地點：荷李活道住好啲側


酒吧何蘭正真係好正，穿彩色旗袍拍照，效果好sharp。
地點：中環蘇豪卑利街


借用對面馬路的植物作為前景，就能拍出仙氣照片。
地點：中環荷李活道石牆樹


圓形石牆加上石獅子相當有古典味，襯旗袍一流。
地點：上環文武廟附近古董店


男裝長衫襯對Vans，竟然帶點潮味。
地點：上環儒林臺


Ding去年到韓國旅行也穿了韓服拍照，希望大家願意在港試穿旗袍。


提供男裝衫　影全家福都得
創立嫣裳記讓Ding意外發掘香港的美麗風景。「做咗咁耐香港人，好多地方無去過，最熟只係返工放工嗰條路。我帶模特兒外出影相，發現好多街角都能影到靚相。」她在網站列出店舖附近的合適影相位，電車內、古董街上、壁畫前、書法招牌下都很有味道。租借旗袍時，她也會人肉介紹。

早前有台灣遊客批評香港「不好玩」，覺得大陸遊客太多，已失去原有特色。Ding對此很感慨：「聽到好唔開心，講真邊有旅客來到一個城市，淨係想行藥房、金舖同連鎖店。我做遊客，都會想行當地特色小店。」區區如餅印，邊個仲想來？佢希望嫣裳記能帶給遊客有趣回憶，穿起旗袍轉街過巷，尋找令人緬懷的香港風情。店舖不只租借旗袍，也提供男裝長衫、小朋友傳統服，一家大細要影張全家福留念，都無問題。


小朋友穿起鮮黃色傳統服，非常可愛。


Ding希望香港人多欣賞自己社區，認為留港一樣可以有旅行感覺。


租借旗袍包簡單髮型設計、借頭飾、頸鏈及手袋。店主仲準備埋止汗劑同剃刀，貼心。

facebook：嫣裳記Yan Shang Kee
旗袍租借費用：$380（9:00am-6:30pm）

記者：葉青霞
攝影：劉永發、部份圖片由受訪者提供
編輯：陳漢榮
美術：黃創泰


source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
旗袍其實好鹹濕