http://video.appledaily.com.hk/mcp/encode/2017/03/18/3302352/20170319_Vsub577AD_clean_w.mp4


Vivian經常在fb網絡熱話或陌生人的帖文留言挑機，但她只覺是講道理，否認是網絡Hater。

身處網絡發達年代，手執一部手機，人人都是記者，擁有一個facebook（fb）帳戶，人人都可以做網絡判官。在網上看到不順眼的人和事，就算三唔識七，也可展開筆戰，將對方罵個落花流水，繼而起底，演變成網絡欺凌，聽落恐怖。近年有個term叫「Hater」（網絡惡意攻擊者），即專門在網上周圍「挑機」搵人鬧的人，有人覺得他們無聊，食飽飯冇嘢做，真係咁簡單？不如聽聽（疑似）「Hater」怎樣說。

認識做記者的關穎欣（Vivian），早知她敢言，也許是跑新聞訓練出來。平日經常見她在fb網絡熱話或陌生人的帖文留言挑機，言行間雖無粗言穢語，而且偏激得來又中point。她更夠膽用真帳戶挑人機，某程度上，我覺得她算是個Hater，但她辯稱只是講道理。訪問前，問她真的不介意出鏡？可打馬賽克保護身份，她卻如烈女般說：「超！講道理之嘛，驚乜呀？」

談起她的「戰績」，她傳來一堆fb截圖，內容是她發現有人賣印有心儀卡通圖案的翻版產品，「我問佢係咪正版，唔係就犯法喎，好明顯佢錯，我啱。」對方明明理虧，竟還覺得委屈，「佢話係自己鍾意，但鍾意就可以賣翻版？我咪咬住佢唔放，其實目的係想佢刪post，因為唔想有人買到翻版，之後有網民幫口話send畀代理睇，最後佢淆底刪post，我唔知係咪贏，總之目的達到咗。」

最近瘋傳的化妝師被走數事件，她關心反而是負責婚禮攝影的攝影師在fb抽水，表示只站在真相是對的一方，結果惹來千多個「嬲嬲」，「佢啲fans話覺得中立都俾人鬧好慘，我覺得中立咪唔好出聲，出咗聲就唔係中立，又講啲好bias（偏頗）嘅嘢，完全唔啱logic。」還有一次，是本報訪問了一個嫁德國男的港女，報道吸到很多「嬲嬲」，指她開設的fb專頁有抄襲成份，雖則訪問沒提過相關事宜，但Vivian一樣「講道理」，「佢抄人嘅成果去吸引人留意，雖然做訪問冇錢收，但賺咗名氣，好多KOL同Blogger都係靠like賺錢，我覺得佢最後係有利益！」

網上罵戰　唔睇post就贏
網民總有不同意見，罵戰往往由此而起，你一句我一句，真的可以拗到2046，Vivian說：「網上嗌交，邊個先唔睇就贏，就算你再鬧我都睇唔到，變咗係你嘥心機。」她朝九晚六返工，經常外勤工作，公司電腦又封鎖fb，平日只靠等車，等位食飯偷時間上fb，「一睇到nonsense嘅嘢就躁」，會忍不住留言，「對我嚟講，玩fb、上網開罵戰係消遣，無聊時咪用幾分鐘留一兩句言。上fb都係想八卦，你set地球（公開）post都係諗住有人留言，我咪配合囉，話明消遣，我有時間同人拗咪繼續，玩夠或唔得閒就唔睇唔覆。」

但Hater往往會引起網絡欺凌問題。「喂，網絡係公開，你喺公開地方講自己嘢，唔可能期望只有正評，見到負評就話係欺凌，咁係雙重標準，你承受唔到就唔好出post，唔好開page同撳入去睇留言。」

既然否認是Hater，哪算是道德L，正義L嗎？自認性格沉不住氣的她說：「都係架，好似賣翻版件事，有人串我係正義L，但我有立場，我尊重原創者，你唔滿意咩？講一句唔會少忽肉，你見到色狼非禮學生妹，唔搞到你箒，但你會唔會出聲吖？我會囉，唔出聲就可能錯落去。」錯要認，打就要企定，她都被捉過錯處。有次她在網上分享日本買的小強噴霧，被人指是危險品，根本不能空運回港，「我即刻check飛行法例諗住back up自己，發現原來真係易燃品，就認錯刪post，自此引以為誡。」


Vivian在網絡上向出售翻版產品的人窮追不捨，終於逼對方刪除post。


Vivian認為鬧還鬧，就算道理在自己一方，也切忌爆粗。


切忌講粗口人身攻擊
網絡世界的她敢言，現實中呢？她直言，「當然少挑機好多啦，因為網上唔識你，唔驚你打我嘛，除非喺街見到打細路，我就一定出聲。」如果被公審的是自己家人或朋友，又怎樣？「係誤會就幫手澄清，真係錯就私下開解，勸佢唔好睇留言。」這個訪問出街後，怕被起底嗎？她說：「唔覺得自己言論好嚴重，加上香港人好善忘，不過，訪問出街後我唔會睇留言。」認真豁達，希望讀者手下留情，否則這個人情我有排還。

但鬧還鬧，切忌爆粗，「啲人會將重點放喺粗口，但我唔係想研究粗口，唔好distract咗我，總之一講粗口就輸。上網鬧交係覺得道理唔係咁，你話人樣衰係無助件事，所以鍾意人身攻擊嗰啲先係Hater囉！」



五大經典網上熱話
14巴港女：2013年，一名港女被拍得在街頭連摑跪地求饒的男友14巴，片段在網絡瘋傳，瀏覽人次至今超過200萬。港女事後被起底及被警方拘捕，最後以$1,000自簽守行為12個月。



補習天王涉「呃蝦條」：去年網上流傳一名任教通識科的男補習教師，與女學生發生性關係，女生將雙方情慾對話放到網上，引起熱議，男教師最初否認指控，並報警求助，但其後辭職，事件不了了之。



化妝師疑被走數：本月初一名新娘化妝師在網上控訴，指被一對新人走數及恐嚇，新人其後在網上對質，反指對方工作態度差劣，並堅稱無走數，又有大量自稱雙方朋友的人出來辯護，至今仍流傳多個版本。



500蚊人情：2012年有女子在個人fb公開表示，謝絕只給$500人情的親友出席其在酒店舉行的婚宴，被網民公審其「港女」行為，其公司、前男友及家人照片等資料均被起底放到網上。



港男無辜被屈棄狗：去年有網民拍到一隻唐狗窮追一輛私家車，引起棄狗疑雲，大批網民留言抨擊車主棄狗，事後證實一場誤會，該唐狗是放養，狗主另有其人，車主無辜被起底及謾罵，大呼無奈。


記者：黃子配
攝影：徐振國
編輯：蕭家慧
美術：孔文彬


source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
港女就收皮