無風無浪的預算案，卻因財政司司長曾俊華年薪逾400萬仍自稱「中產」，辣㷫不少港人。他昨出席電台烽煙節目時補鑊稱，中產不一定以薪金設限，而是一種生活態度，「有文章話飲咖啡嘅人係中產，或者鍾意睇法國電影嘅人係中產」。但此話一出，令市民越聽越㷫，紛紛打上電台反駁，「你幾百萬年薪都係中產，全香港幾百萬人要你扶貧喇！」記者：陳雪玲 譚靜雯

財爺曾俊華在新一份財政預算案中，被指協助中產的稅務措施不足，他日前理直氣壯否認，自言本身是「中產」，所以明白中產壓力。他昨日出席電台聯播「財政司司長熱線」節目，重申自己在中產家庭長大，大學畢業後與太太都是專業人士，由「美國中產」做到「香港中產」。他說：「我嘅生活，lifestyle（生活態度）都係中產，（中產）未必只係人工設限，其實係一個lifestyle……我睇過有啲文章話飲咖啡嘅人係中產，或者鍾意睇法國電影嘅人係中產，我喜歡睇吓戲、飲茶，同一般中產生活上冇大分別。」

聽眾林太聽完曾俊華為中產定義後，即打上電台怒斥：「曾生，我唔忿氣叫你財政司（司長），因為你唔夠班。你幾百萬年薪都係中產，全香港幾百萬人要你扶貧喇！」
另一聽眾陳生則訴說中產悲歌，自言月入近20,000元，但租金已用了7,000元，其餘水、電、交通費，生活十分艱難。他說：「高高在上嘅司長竟然當自己係中產，唔怪得將中產好似你閣下咁對待啦﹗」
中產之聲主席李子榮也批評，曾俊華的「中產論」荒謬、涼薄。他認為，本港中產人士每月入息應介乎2萬至10萬，並同時需考慮樓宇負擔、是否專業人士等因素，「唔係飲吓咖啡、睇吓法國電影咁簡單」。

「佢當我哋係提款機」
李子榮指，中產一族面對高樓價、高租金壓力，「財爺似乎覺得我哋掂㗎啦，都係提款機嚟」。他稱，曾俊華基於社會環境及政治壓力，犧牲中產，「我哋交稅都希望有一定回報，由我地自生自滅，條氣唔順！」
中文大學政治與行政學系高級講師蔡子強表示，中產一直有怨氣，中產論只是導火線，「最大問題係中產享受唔到房屋福利，供樓或交租佔佢哋收入四至五成，其實中產生活未必比低下階層好好多」。
市民對預算案彈多讚少，有「N無人士」希望輪候上公屋期間，政府可提供租金津貼，但曾俊華認為此舉會扭曲市場，反令租金上升，或令輪候冊人數大增。有市民建議聯繫滙率脫鈎，以減低本地通脹，曾俊華直言無意作任何改動，因為鄰近香港的經濟體，與一籃子貨幣掛鈎，但通脹不低於香港。

http://hk.apple.nextmedia.com/news/art/20130301/18180531