http://video.appledaily.com.hk/mcp/encode/2017/03/30/3312042/20170331_Vvvsub735_clean_w.mp4


主子阿細最活潑，明明很怕我們這些陌生人，看到Derrick升高飯桌，又八八卦卦從貓橋走下來。

「佢霸咗我張床」、「佢瞓住keyboard我點做嘢？」此乃貓奴生活日常。口裏埋怨實質放閃，公告天下主子有多可愛。貓奴黃景成（Derrick）兩年前搬入新居，為三位主子整地台做好收納，畀佢哋通屋走，名正言順行Catwalk。佢仲整埋可以跳上跳落的高身玻璃櫃，令主子維持「我在櫃內看風景，櫃外啲人又摸我唔到」的氣勢。

貓最怕陌生人， Derrick家的三隻貓阿細、懵薯同Miu Miu每逢有外來人入屋，總係進佔全屋最進可攻退可守的位置──橋上。乜橋？貓橋！在天花對落位置有條木橋，兩端連接貓主子的木身玻璃櫃及讓牠們活動筋骨的牆上梯級。人有房，喵星人一樣有自己地頭！「佢哋喺玻璃櫃裏面可以望到你，但你又摸唔到佢哋，佢哋會覺得安全啲，一有人就匿晒入去。」原來Derrick其中一隻貓氣管不好，曾想過用玻璃櫃「密室」困貓，將蒸氣噴入，讓牠紓緩不適。不過他問過室內設計師意見，發覺工程浩大，加上細心諗過貓貓應不喜歡這種「治療」方式，便放棄念頭。這個高身玻璃櫃錯有錯着成為三貓安樂窩。須知道香港最珍貴嘅就係空間，寸金尺土呀大佬，Derrick兩夫婦真係好錫貓貓。「都當佢哋係屋企人㗎啦，養得寵物都係咁諗，希望佢哋住得舒服。」主子要乜，天下貓奴都會笑住供給。




實用面積：356呎
裝修時間：兩個月
裝修費用：約16萬
設計公司：MapOut

升降飯桌　高智慧收納
Derrick與太太之前租屋住，當然不會花心思布置家居，環屋皆山也，乜山？係雜物山。兩人三貓及群山共處一室，都咪話唔逼狹，所以大約兩年前置業遷入新居，頭號重點──收納！「以前將啲嘢擺晒出嚟，佢哋會推跌晒，搞亂頻率好高，?家做咗地台收晒啲嘢入去，我哋唔使成日執拾，方便啲。」這裏樓底有三米高，做了地台都不算侷促，人貓可用空間大大增加。成日覺得利用地台儲物令一室更整潔，但攞嘢出來的麻煩度也同時提高。「真係唔常用嘅先會擺入去，擺得入去都唔會預成日拎出嚟，始終唔想整太多梗櫃。」Derrick覺得清潔地台尚算方便，倒瀉嘢用濕布一抹即掂。「因為地台塊板係夾板底膠板面，唔易刮花，一般好似平日咁拖地都無問題。」不過原來養貓用地台都有麻煩事。「貓會吐貓毛，如果剛好吐在板與板之間罅隙，就要揭開兩塊板清理。」Derrick認為建地台利多於弊，不過太太剛懷孕，將來小朋友出生，走上地台的一級就要鋪軟墊了。

地台還有個機關，可以把飯桌隱身，用遙控就能將之升高。現場看到飯桌升起速度似校了慢鏡，好…耐…好…耐…先…完…全…升…起！「升降頻率唔高嘅，都係食飯先升起，一日一次。有時食啲輕食，我會就咁食，唔用枱。」飯桌有安全裝置，夾到嘢會彈起。不過機械嘅嘢，總有失靈一日喎。「都怕佢壞㗎，不過如果幾年後真係壞，其實都唔難買，搵師傅配同款同色膠板，調好番個升降水平同地台一樣，一定要調得好準，否則佢會因安全裝置設定而彈起。」土地問題令大家扭盡六壬，爭寸土闢空間，升降飯桌算係呢個時代逼出來的智慧產物，不過見到貓貓好奇跳上去，如同歌手在紅館舞台上徐徐升起，畫面又幾有趣嘅！


貓櫃內的階級可讓貓貓隨時伸展筋骨。


客廳有一排高身書櫃，用上黑板牆。Derrick覺得閒時畫些不同東西，隨時轉主題，沒那麼悶。


三貓見我等陌生人進屋，即躲在高高在上的貓橋，俯視我們。


貓橋另一端，接駁到接近露台落地玻璃窗位置。


貓奴好細心，貓橋盡頭附設梯級，讓貓一步步走下來，唔使下下都跳。


356呎的人貓之居建地台搞好收納，望落相當闊落，貓貓可在屋內所有空間跑跑跳跳。


做了地台，與露台的高低有別，設計師特別做了如同小箱的梯級，拿走後跨出露台較安全。


用地台雖可收納整齊，但每次拿東西都要用吸盤把硬淨重身面板抽起。


上地台的一級設有櫃桶，較常用的雜物就存放在此。

記者：葉青霞
攝影：黃子偉
編輯：陳漢榮
美術：孔文彬

source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
好得意