Model X身份好特殊，好多人形容為「全港首部電動 MPV」，但其實它的車架與 Model S一模一樣，而且 Model X的基本型號亦只係得五座，但車主則可額外加錢變成六座（ 2+2+2）或七座（ 2+3+2），而本地顧客相信九成揀七座版。

今期最紅偶像派　 Tesla Model X 90D

文章出街之日，全港電動車「零稅」優惠已成過去，原廠超級充電站亦不再是「免費早午晚餐」，依家先走去買 Tesla，車價貴一大截，養車成本又會高好多，唔使風水佬預測都可以肯定， Tesla銷量將會急跌，而 Model X自然不會例外。

至於這篇試車報告，相信無助於銷情，對已是 Model X車主的，恐怕亦沒甚參考作用。不過，始終今期最紅、街道上「能見度」最厲害的，就是 Model X，職責所在，點都要試試。

課稅後躋身過球級別

售價：$1,880,100（連稅）

電池： 90kWh鋰電池，四輪驅動

續航距離： 489km

加速： 0-100km/h， 5.0秒

極速： 250km/h

長/闊/高： 5037/2070/1684mm

重量： 2391kg

查詢： Tesla Motors HK Ltd

網址：http://www.tesla.com

讚一讚：繼續高科技，繼續矽谷 style；車門係焦點，車廂係焦點，七座係焦點，電動係焦點，好快係焦點，好賣係焦點……

彈一彈：癲快卻不刺激；後座開到門都唔代表一定上到車；車廂編排及組裝略欠細心；課稅後車價急升，購買意慾大減。



同一般 MPV一樣，七座模式下尾箱容量總會變成「有限公司」，唯一優勝之處是深度夠，揭起地台板仍可放得落單車。



五座模式就可以有番個大尾箱，尾排座一按掣（頭枕側）便會自動摺低頭枕，可惜瞓低及拉起都要全手動，而且不設手抽或任何輔助硬件，手不夠長便要走去中排推，失策。



市面上唯一有前行李箱七人車，容量頗大好適合擺放血拼戰利品，說服身邊人好藉口。



每張椅背都有類似 piano black的焗漆處理，是兩座位跑車常用的點綴修飾，冇錯係靚係高級，但對常要載客的 MPV而言就容易被大意乘客刮花，另一個更嚴重問題是好反光，試想像身旁是位穿迷你裙的乘客，便知情況有幾尷尬。



「大銀幕」覆蓋面積幾近 B柱位，開揚氣氛更勝傳統大天幕，而玻璃經防 UV處理，怕曬的話 A柱隱藏了遮光板，亦可加裝外置遮光網，算做照顧周到。



受制於車門設計，門壁冇可能有儲物空間， Tesla想到參考客機，隨身物品可放於座椅下，算唔算方便？請自行判斷。



中排設有 one touch掣，一按會自動移前騰出通道，闊度一般，但由於地台特低又唔怕頂頭，加上後輪拱位零舍圓滑，好輕鬆便可捐入尾排座位。



前座剪裁靚又厚身，坐姿幾舒服，電動調校也細緻。廠方話純白皮料經特別防污處理，清潔容易兼不怕牛仔褲甩色，孰真孰假，仍有待時間引證。



最後排空間算人道，周圍圓碌碌似跌落浴缸，腳位則視乎閣下與中排

乘客友誼關係而定。



多付$1900便可將車廂碳纖化（真碳纖，非仿製品），真心抵，目測下裝嵌手工有進步，但車窗掣仍用平治產品，感覺總是怪怪哋。

中排三張座椅呈獨立設計，坐姿自然唯獨質料比較硬，勝在可獨立調校角度；頭頂一樣有防 UV天窗仔，奇怪不設任何遮光設施，冇計，夏天焗住曬。







中控台大致上與 Model S一樣，同樣奉行無掣簡約宣言，大部分操作都要靠 17吋大 mon控制，方唔方便已非重點，最緊要夠 cyber，人人上車都驚訝到嘩嘩聲，先至係其真正功能。講細心位，其實亦有，就例如冷氣循環系統已達 HEPA醫院規格，連毒氣都能過濾。原因？美國多恐襲嘛！



鷹翼門加上大玻璃， Model X重心其實幾高，好彩驅動系統及電池擺位夠低，身手雖不及 Model S，但以七人車論行車穩定性就確實好強， body roll輕微，有四驅加靚胎幫手，容許你用較兇狠手法出入彎，但先要習慣它一（縮油）便會有回收電能的奇怪拉扯效果，建議多用煞車來控制速度。在加速力上， 5秒踩至 100km/h實在癲快，但這種大扭力又好線性的加速感，在層次上就欠缺引擎蕩氣迴腸的轉數攀升，亦沒有轉波時的抑揚頓挫及澎湃喉聲，論官能刺激性，還是一般而已。



車長逾 5米，從 20吋輪圈升級至 22吋仍不覺 oversized；除小尾翼之外（固定式，不設電動升降），車底亦設有導流器，風阻系數是頗出色的 Cd0.24，難怪行車靜上加靜。



目測所見， Model X每次打開鷹翼（ Falcon Wings）車門都總有途人舉機拍照，吸睛能力毋庸置疑。

至於車門感應器有幾準確？如何在狹窄位置張開？網絡上大把介紹，無謂多講了。總之，純粹在使用角度出發，它的確有進出 headroom特高的優勢，但講實用，就點都不及趟門，而且盡開高度 2.3米，落「地獄停車場」更是得物無所用仲要買幾盒驚風散傍身，你選擇要「型」，自然要付出代價。



避震設有五級高低調校，氣壓式結構，但運作時嘈吵過全機械式。　



軚盤亦有三種模式選擇，純粹是重量之別，無助改善軚感。



泊車 cam十分清晰，配合大 mon顯示，泊車零難度。

撰文：廖宏俊

攝影、攝錄：方保山

[email protected]

來源 source: http://hk.next.nextmedia.com

+++++++++++++++++++++++++++++++++++++++++++++++++++++++++++++++++

唔錯喎