http://video.appledaily.com.hk/mcp/encode/2017/04/15/3323912/20170416_Vsub281AD_clean_w.mp4


Perry家有大大隻日本佐藤製藥吉祥物佐藤象。他謂購買後先諗點託運，好彩大小剛好沒超標，可以寄飛機艙運回來。

「?家啲人好鍾意講斷捨離，我係反斷捨離嘅人。」「反」並非反對，只是反其道而行。楊海樺（Perry）身不由己，一屋玩具書誌舊物珍藏，呢件有童年回憶，嗰隻有有趣故事，點斷點捨點離？珍藏櫃沒玻璃門處處惹塵埃，他找家務助理對付，可是敵得過灰塵，卻躲不過進擊的貓貓。

一眼望埋去Perry兩個5×5珍藏格仔櫃，我見到兩個字：無盡。由上到下由左至右向各位玩具行注目禮，我對眼表示：好忙。我個心暗忖：個櫃左邊第五行第二格，同右邊第三行第一格，啲玩具好似差唔多喎，線條都係圓碌碌的，真係有必要儲咁多咁多咁多咩？「可能我做美術設計，有些嘢設計得好好，我就好想買佢返來慢慢研究。越簡單嘅嘢，設計越難。同埋?家香港氣氛咁複雜，返到屋企如果見到啲簡單線條嘅嘢，我就好滿足好開心。」從事廣告美術指導的他因而鍾情薯蛋頭。「佢無多餘嘢，可以係咁轉啲眼耳口鼻，好簡單就做到適合小朋友、大人一齊玩。」朋友送佢70年代版本，合晒佢合尺。「薯蛋頭每個年代都有變化，以前甚至簡約到冇手。」

成間屋感覺就係呢個大細路嘅樂園，但其實佢同女朋友同居。身為女仔，我企番喺阿女友嗰邊，喂唔啱數喎，成間屋啲嘢都係你㗎喎。佢笑住話：「我都有畀位置佢放嘢，唔好咁講。佢物慾無我咁強。佢有時都會埋怨，話我成日買垃圾返來。」女友沒有對玩具日久生情，佢有啲無奈。「薰陶唔到佢呀，說服唔到佢，佢說服我唔買就有試過。」父母女友都知宇宙冇嘢阻到佢繼續買嘢，惟有接受。


愛貓之人Perry不介意貓主子半夜掃跌櫃中玩具。


70年代薯蛋頭沒手，腳也跟現在的有分別。他喜歡昔日版本多於現在的。


較矮身的梳化令一室空間不覺侷促。


麥當勞BB凳於eBay買來，運費比貨價還貴，他跟賣家多傾幾句以表誠意，最終對方願意減價割愛。


他提到多年前新港中心樓下有家咖喱屋，吉祥物總是讓他念念不忘，他卻因衝動沒看清楚，在日本市集買了假貨。他說就當買個教訓。


他特別喜歡簡單線條的玩具，包括知名畫家James Jarvis這個police figure。年前畫家來港，他早上五點衝去排隊拿簽名，去到卻發現只得他一人。他笑謂：「我自己鍾意，就以為全世界都鍾意。」

童年麥記BB凳　運費貴過件貨
屋企空間係得咁大，靚嘢無間推出，以有涯隨無涯，逼矣。為咗令350呎地方望落唔逼狹，一定要出術。「牆我會油白色，令空間睇落大啲。呢度樓底唔高，惟有買低啲嘅梳化，加上打通廳同廚房，感覺無咁壓迫。有啲空間我一定會留番唔擺嘢，例如門口至梳化位置。」擺平到女朋友，解決到家居土地問題，沒想過貓主子Chewie會踢玩具洩憤。「我一直以為佢唔會闖呢個禁區，自從佢閹咗之後，可能係太嬲，佢晚晚三四點逐粒逐粒將啲玩具掃落地發脾氣，但冇辦法，我太愛太錫佢，就逐粒逐粒執番上去擺番好囉。」貓奴儲物狂對住主子，真係冇晒符。玩具vs主子，命根即時冇咁重要呀！

佢承認以前有試過亂買，但越買越知自己鍾意乜。近年買嘅嘢多與回憶有關。佢屋企張麥當勞BB凳從美國運來，運費比件貨仲要貴，都一於照買。「童年回憶，無辦法，細個坐過，呢啲凳我覺得好靚，?家嗰啲無呢啲圖案，好簡單，想你快啲食完快啲走，但以前係會吸引你留低。」佢笑自己老咗，喜歡想當年，好希望買番兒時心頭好。「細個阿爸阿媽唔會買咁多玩具，大個就用兩三倍價錢買番，其實摸頂㗎。但玩番以前啲嘢，真係好開心。」佢更加會買番舊遊戲機，例如世嘉五代、超任，甚至紅白機，駁部舊電視來玩，變番個細路仔，懷舊一番。

佢懷舊源於欣賞昔日產品的耐用。「以前啲人設計件貨出來，唔會好易一瞬即逝，係預你用幾十年的。」佢希望大家追新事物，也別忘記舊物的美好。


採用開放式廚房減少間隔，空間也有放大感覺。







記者：葉青霞
攝影：張志孟
編輯：梁浩維
美術：楊永昌

source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
咁夠胆