http://video.appledaily.com.hk/mcp/encode/2017/04/29/3334837/20170430_Vsub477AD_clean_w.mp4


阿沛當了十年廣告換畫師傅，滿足於工作的他笑言：「?家見到太陽好似見光死！」

香港幾乎每個角落都遍佈大大小小的廣告：巴士站和港鐵有燈箱廣告，街道上有帆布廣告，連大廈外牆都有貼紙廣告，與我們生活密不可分。你又可有想過，當一個新產品上場，或有電影上時，是誰把廣告換上新裝？入黑後，究竟廣告公司換畫員肖錦沛（阿沛）的工作是怎樣的呢？

「?家見到太陽好似見光死！」約阿沛於凌晨時分採訪，記者好眼瞓，他卻笑容滿臉精神爽利的樣子，細說他的入行經歷。阿沛曾於工程公司做安裝及佈置工作，十年前加入廣告公司轉行返夜班，每天晚九朝六上班，4至5人一更出動。阿沛的公司包攬數條港鐵沿綫和部份巴士站廣告，工作範圍極廣，還隨身帶着一張禁區紙，方便來回落馬洲和羅湖替廣告換畫。因工作視乎客戶所買的廣告期，所以換畫數目和地點都不定，阿沛指：「總之有廣告的地方，我哋都有機會去到，而且日日基本上都同時間鬥快。」平時他們戴上手套，帶齊?刀、安全帽、索帶等工具，就駕着公司車出發走遍港九新界。因廣告翌日早上便要見街，換畫一定要天光前完成。談到最深刻經歷，他說不得不提最高紀錄3小時內完成粉嶺華明邨和屯門小欖巴士換乘站的掛畫。「因為5點頭班巴士已經開出，我哋盡量唔打擾乘客，想喺之前完成。當時做完華明邨已經兩點幾，如果要順利完工要3點幾去到屯門，再用一個鐘的時間起好，唔可以行錯路之餘仲趕餐死。」最後趕得及完成小欖八塊掛畫，不久就天光，仲準時過灰姑娘。


廣告公司換畫員肖錦沛

夏天日曬雨淋　冬天凍到雙手僵硬
一聽就知他打辛苦工，但他直言趕頭趕命已是家常便飯。會否經常遇到突發的事？他回答：「成日啦！我哋同時間鬥之餘，仲要同個天鬥！」例如香港夏天多雷暴大雨，雖然三號風球或以上都因為安全問題而停工，不過風雲色變，有時風球未掛已經大雨至全身濕透，都只能照做，「誇張到連安全鞋都可以倒水出來！同事仲講笑話『啲衫扭到水出嚟』，大家就齊齊扭，好溫馨㗎。」夏天有雨季，不過冬天同樣棘手！皆因他試過幾年前不尋常冷鋒來港，凍到雙手僵硬，「有次得幾度，手僵硬到拉索帶都幾乎無力氣，手不停震，發唔到力。後來有同事提議話『啲牙夠力，不如試吓用牙咬！』」最後，他們用牙咬着索帶向後拉繫緊廣告畫，「又真係成功得咗！」雖然惡心，但總算是無辦法之中的辦法。

返夜班十年　反而有時間湊女
廣告，廣而告之，最重要吸睛，所以一般廣告都有起碼兩、三米。若掛畫的地方太高，阿沛和其餘隊員都會預備爬梯，或坐上公司的專用升降台車。他既不怕高也不怕鬼，最怕的竟然是尖沙嘴。他解釋：「香港哋咁光，無話怕黑怕鬼喇。反而尖沙嘴比較多白鴿，試過成塊牌都有白鴿屎，一撻撻要抹走的話不可以快，又不可以太大力。」又試過有人塗鴉，害他抹足兩小時，因為常用掛畫都是布料，不能用化學清潔劑，只能用清水，「惟有慢慢捽囉！」不過，辛苦都是次要，不少人都覺得返夜班最慘是犧牲了與朋友和家人相處的時間，他思索一陣後搖頭說：「十年前我個女得幾歲返緊幼稚園，兩公婆都返早班好難照顧阿女。返夜好處在阿女有啲需要家長參與既學校活動，我反而有時間去。或者佢唔舒服，我都有時間陪佢睇醫生。」打這份工，背後原來還為了爭取和女兒相處的時間，還因為一份滿足感，「在很短時間內，安排工作而又順利完成，就係我最大的滿足感。唔鍾意都唔會做足十年！」或許你在街頭與他有一面之緣，卻未曾停步留意過他，其實入黑後，一直有班人默默工作，努力為這個城市打拼。


返夜班反而令阿沛多了時間與家人相處，尤其出席女兒學校活動。


阿沛解釋常用掛畫都是帆布的質料，只能用清水清理塗鴉污迹，有次他更抹了足足兩小時。


換畫員主要工具包括安全帽、反光衣、?刀、手套、軟尺、工業用鞋，以及用以刮平貼紙的工具。

記者：鍾藹寧
攝影：林栢鈞（部份圖片由受訪者提供）
編輯：梁浩維
美術：孔文彬

難得生性暴龍哥創科眾籌夢，遭隱世肥報販秒殺！ https://goo.gl/hnEB7D

「蘋果VR」App
App store下載：https://goo.gl/0kW2cK
Google Play下載：https://goo.gl/4K7EHw

source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
好慘