早排先講到迪士尼「人扮公仔」好快被機械人取代「冇得撈」，但事實係好多「人扮公仔」其實都唔想撈，尤其是要對住依家蠻不講理的家長旅客，仲力數他們的「五宗罪」，有部分都真係幾唔值得原諒。

第一宗罪︰逼小朋友影相

明明小朋友喊晒口話唔中意呢隻卡通人物，唔想行過來影相，但一眾家長都好似聽唔到咁，不斷逼小朋友要影相，死唔放棄。

第二宗罪︰貪心家長教小朋友狂拎貼紙

唔理「人扮公仔」手上拎住幾多嘢、唔理「人扮公仔」日曬雨淋，家長都死推小朋友「攤大手板」拎貼紙，唔止拎完一張又一張，仲要非常無禮貌，就咁拋低一句「喂貼紙」，令「人扮公仔」感到不被尊重。

第三宗罪︰毫無童真

有班家長不斷同小朋友講︰「呢隻公仔係假，係人扮。」迪士民係夢幻國度，家長不斷將個「假」字掛嘴邊，真係好想反問佢一句︰「假你又影？」

第四宗罪︰阻人收工

首先影相係要排隊，排隊係有隊尾，而隊尾亦會截龍，最怕家長你一句「做咩截龍」、我一句「影埋呢張」，如果人人都咁講，「人扮公仔」永遠冇得收工。

第五宗罪︰十問九唔應

有時「人扮公仔」都想同旅客、小朋友傾計互動一下，同你講廣東話，你唔應，講英文又唔應，同你講普通話，你又要大大聲話自己講廣東話，咁係咩意思？

「人扮公仔」都係人，下次不妨講句「辛苦晒」，一齊化戾氣為祥和啦。

來源︰HKDL_Secret fb ／網上圖片
https://hk.finance.yahoo.com/news/怪獸家長-迪士尼-人扮公仔-憤怒了-023924315.html