http://video.appledaily.com.hk/mcp/encode/2017/05/11/3343741/20170512_Vsub658newnewAD_clean_w.mp4


大潭水壩橋這條路只有五米闊，每逢有巴士或大車經過，都令人覺得驚險。

一部Model X，一部新巴，大家會諗起乜？當然係近期網上熱傳於大潭水塘水壩，被航拍影下「唔夠過」的尷尬場面。這條有一百年歷史的水壩橋路，只有五米闊但要雙線行車，丹尼士三叉戟新巴已闊2.5米，而Tesla Model X就闊2.27米，即是只剩23厘米空間，又真係容易膽怯嘅。條路窄到咁，究竟有冇得搞？

城市大學建築及土木工程系助理教授馮穎匡博士（Ivan）說：「這是古蹟，以混凝土及花崗石建造，鋼結構比較少。如果真的擴建也有一個方法，始終也是古蹟，要先檢視結構，然後削掉兩側花崗岩石壆，再從側邊外面鑽孔從外掛上鐵欄。兩側會因此多了20多厘米，相信兩架大車都夠過。價錢方面由幾百萬至一千萬左右，那要看政府覺得有沒有這需要。」Ivan自己就覺得冇咁大需要，但可以參考外國於兩邊橋頭加裝感應器及燈號，又或者在繁忙時間搵民安隊幫手疏導交通。

至於熱傳的網片，個個網民都笑Model X車主將部車扭來扭去，唔知做乜。教車師傅唐贊強就幫佢稍稍平反，「他是偷錯位，我也不明白他為甚麼會向右扭。唯一原因可能是他想將考牌靠左的動作做了出來，有一個教泊S位的動作。他都不算完全錯晒，只是毋須向右偷咁多位。」唔想俾人笑唔識揸車，師傅就認為當見到大車於對面橋頭，就於另一邊橋頭等讓佢先過，因為彎位遇大車好難過，不夠膽的話過不到。其次距離感就要靠多練習，「你要習慣腦中有一幅圖畫，其實你坐在頭轆的甚麼位置，知道自己同左邊車頭的距離，咁就會比較容易估到車身左邊，有幾多位剩？」好抽象？唔緊要，師傅仲有一招！「首先將車駛近石壆約一呎停低，然後望住車頭玻璃喺石壆盡頭，放一隻公仔，我就放隻貓仔，咁每次公仔掂到石壆，就代表你部車左邊得番一呎位。公仔坐在石壆邊，這距離永遠不變，除非椅子位置移動了或人向前傾。」如果嘗試駛近石壆，貓仔就會坐咗上行人路，咁即係部車同石壆只剩三四吋距離。石壆盡量不要超過貓仔兩吋，否則車轆就會掂到石壆了。「最重要是你先要保持車身的方向感是平衡，即係眼望遠啲，唔好太大力捉軚環。」不過師傅就強調，唔好太過依賴貓仔呢個方法，咁樣反而會影響自己揸車感覺。


師傅教將用一隻貓仔放車頭，用來看車身與路壆距離的指標。


教車師傅唐贊強認為要技術好始終是多練習，在狹窄停車場多兜圈。


馮穎匡博士指出水壩橋可以擴闊路面，不過成本頗高，有點不值。


使用這類不佔用路面的欄杆可以有助擴闊路面。


橋上遇上對頭車，中間的確所剩位置不多。


馬路的事、小心駕駛等fb群組最近熱傳的Model X過橋片段，引來網民熱烈反應。

記者：許維雅
攝影：梁志永

2017果籽繼續認真知味。識買惜用。行以求知。好事多為。重修舊好。
緊貼果籽報道，即like：http://fb.me/AS.AppleDaily

source : http://hk.apple.nextmedia.com/
+++++++++++++++++++++++++++++++++++++++++++++++++++++++++++++++++
即刻放隻去架車到先